चिखली | सुनिल अंभोरे, प्रतिनिधी
सायंकाळच्या वेळेत बस उपलब्ध होत नसल्यामुळे विद्यार्थ्यांसह प्रवाशांची होणारी गैरसोय लक्षात घेता चिखली–मेरा खुर्द–मेरा बुद्रुक–दरेगाव मार्गावर रात्रीची मुक्कामी एसटी बस सेवा तातडीने सुरू करावी, अशी मागणी क्रांतिकारी शेतकरी संघटनेचे अमोल मोरे यांनी केली आहे. याबाबत त्यांनी बुलढाणा विभागीय कार्यालयात निवेदन सादर केले आहे.
चिखली हे तालुक्याचे ठिकाण असल्याने मेरा खुर्द, मेरा बुद्रुक, अंत्री खेडेकर, गुंजाळा, मनुबाई आणि दरेगाव परिसरातील अनेक विद्यार्थी शिक्षण, महाविद्यालय, कोचिंग क्लासेस तसेच इतर कामांसाठी दररोज चिखली येथे ये-जा करतात. याशिवाय कामगार, व्यावसायिक आणि शेतकरी वर्गाचीही चिखली येथे नियमित ये-जा असते.
मात्र सायंकाळच्या वेळेत पुरेशी आणि वेळेवर बस उपलब्ध नसल्यामुळे विद्यार्थ्यांना गावाकडे परतताना मोठ्या अडचणींचा सामना करावा लागत आहे. अनेकदा खासगी वाहनांचा महागडा प्रवास करावा लागत असून, त्यामुळे पालकांचीही चिंता वाढली आहे.
चिखली आगारातून सायंकाळी सुटणारी आणि दरेगाव येथे मुक्कामी राहून दुसऱ्या दिवशी सकाळी चिखलीकडे परतणारी बस सुरू झाल्यास या मार्गावरील विद्यार्थ्यांसह ग्रामस्थांची मोठी सोय होईल. सकाळी चिखली येथे शिक्षणासाठी जाणाऱ्या विद्यार्थ्यांनाही या बससेवेचा फायदा मिळू शकतो.
मेरा खुर्द, मेरा बुद्रुक आणि दरेगाव मार्गावर प्रवाशांची संख्या मोठी असतानाही पुरेशी सार्वजनिक वाहतूक उपलब्ध नसल्याने नागरिकांना खासगी वाहनांवर अवलंबून राहावे लागत आहे. त्यामुळे चिखली–मेरा खुर्द–मेरा बुद्रुक–दरेगाव मुक्कामी बस सुरू करण्याची मागणी करण्यात आली आहे.
ही बससेवा सुरू झाल्यास विद्यार्थ्यांचा प्रवास अधिक सुलभ होण्यासोबतच ग्रामस्थांना सुरक्षित आणि परवडणारी सार्वजनिक वाहतूक उपलब्ध होईल. तसेच या मार्गावर नियमित प्रवासी मिळाल्याने एसटी महामंडळालाही महसूल मिळण्याची शक्यता असल्याचे अमोल मोरे यांनी निवेदनात नमूद केले आहे.
विद्यार्थ्यांचे शैक्षणिक नुकसान
मेरा खुर्द, अंत्री खेडेकर आणि मेरा बुद्रुक मार्गावर सायंकाळच्या वेळेत बस नसल्यामुळे शाळा व महाविद्यालयातून उशिरा सुटणाऱ्या विद्यार्थ्यांना गावात पोहोचण्यासाठी अडचणी येत आहेत. खासगी वाहनांवर अवलंबून राहावे लागत असल्यामुळे पालकांची चिंता वाढली आहे. मुक्कामी बस सुरू झाल्यास सकाळी गावातून चिखलीकडे जाणाऱ्या विद्यार्थ्यांनाही वेळेत पोहोचणे शक्य होईल.
— कैलास आंधळे, मेरा बुद्रुक
प्रशासनाने तातडीने निर्णय घ्यावा
“रात्रीची मुक्कामी बस दरेगाव येथे थांबल्यास सकाळी ग्रामस्थांना आणि विद्यार्थ्यांना वेळेत शहरात जाता येईल. राज्य परिवहन महामंडळाने प्रवाशांची व विद्यार्थ्यांची गरज ओळखून ही बस लवकरात लवकर सुरू करावी.”
— अमोल मोरे, क्रांतिकारी शेतकरी संघटना
📲 चिखली आणि बुलढाणा जिल्ह्यातील kattanews.in ताज्या बातम्या WhatsApp वर मिळवा!
