राहुलभाऊ गप्प… चिखलीच्या राजकारणात मात्र मोठ्या हालचाली; भाजप प्रवेशाची चर्चा पुन्हा ऐरणीवर

चिखली : विशाल गवई 

बुलढाणा जिल्ह्याची राजकीय राजधानी म्हणून ओळखल्या जाणाऱ्या चिखली विधानसभा मतदारसंघात सध्या राजकीय घडामोडींना वेग आला आहे. माजी आमदार तथा माजी जिल्हा काँग्रेस कमिटी अध्यक्ष राहुल बोंद्रे यांच्या भाजप प्रवेशाची चर्चा पुन्हा एकदा जोर धरू लागली आहे. विशेष म्हणजे, या चर्चांच्या पार्श्वभूमीवर राहुल बोंद्रे यांनी मौन बाळगल्याने राजकीय वर्तुळातील उत्सुकता आणखी वाढली आहे.

राहुल बोंद्रे भाजपमध्ये प्रवेश करणार असल्याची चर्चा चिखली मतदारसंघात गेल्या काही वर्षांपासून सातत्याने होत आली आहे. यापूर्वी अनेकदा या चर्चांना उधाण आल्यानंतर स्वतः बोंद्रे यांनी भाजप प्रवेशाच्या शक्यता फेटाळून लावत आपण काँग्रेसमध्येच असल्याचे स्पष्ट केले होते. त्यामुळे ‘राहुलभाऊ भाजपमध्ये जाणार’ ही चर्चा अनेकदा केवळ राजकीय चर्चेपुरतीच मर्यादित राहिली.

मात्र, गेल्या दोन दिवसांतील काही राजकीय हालचालींमुळे यावेळी या चर्चेला वेगळे महत्त्व प्राप्त झाले आहे. पक्ष पदाधिकारी, प्रमुख कार्यकर्ते आणि नगरसेवकांच्या बैठका झाल्याची माहिती समोर आली असून, त्यानंतर राहुल बोंद्रे यांच्या संभाव्य भाजप प्रवेशाबाबतच्या चर्चांना पुन्हा बळ मिळाले आहे.

विशेष म्हणजे, ९ ऑगस्टनंतर या चर्चांना अधिकृत राजकीय हालचालींची किनार मिळाल्याचे बोलले जात असून, १३ ऑगस्ट रोजी प्रवेश होणार असल्याची चर्चा सध्या चिखलीच्या राजकीय वर्तुळात रंगली आहे. मात्र, या संभाव्य प्रवेशाबाबत राहुल बोंद्रे किंवा भाजपकडून अद्याप अधिकृत घोषणा झालेली नाही.

दरम्यान, राहुल बोंद्रे यांनी काँग्रेसमधील काही नेत्यांना आपल्या निर्णयाची माहिती दिल्याचे आणि सध्याच्या परिस्थितीत पर्याय राहिला नसल्याचे सांगितल्याची चर्चा आहे. या माहितीला अधिकृत दुजोरा मिळालेला नसल्याने त्याबाबत निश्चित निष्कर्ष काढणे योग्य ठरणार नाही.

दुसरीकडे, चिखलीतील श्रीराम नागरी पतसंस्थेच्या सभागृहात भाजपच्या आमदार श्वेता महाले यांच्या उपस्थितीत पक्ष पदाधिकारी आणि प्रमुख कार्यकर्त्यांची बैठक झाल्याची माहिती आहे. आगामी राजकीय घडामोडींच्या पार्श्वभूमीवर या बैठकीत चर्चा झाल्याचे सांगण्यात येत आहे.

याच काळात माजी आमदार राहुल बोंद्रे यांनीही नगरपालिकेतील नगरसेवकांची बैठक घेतल्याचे सांगण्यात येत आहे. एकीकडे भाजपच्या पदाधिकाऱ्यांची बैठक आणि दुसरीकडे बोंद्रे यांची नगरसेवकांसोबतची बैठक यामुळे त्यांच्या संभाव्य पक्षांतराच्या चर्चेला आणखी हवा मिळाली आहे.

या सर्व घडामोडींमध्ये सर्वाधिक लक्ष वेधून घेणारी बाब म्हणजे राहुल बोंद्रे यांचे मौन. यापूर्वी अशा चर्चा सुरू झाल्यानंतर त्यांनी स्वतः भूमिका स्पष्ट केली होती. मात्र, यावेळी ते कोणतीही स्पष्ट प्रतिक्रिया देत नसल्याने त्यांच्या भूमिकेबाबत तर्क-वितर्कांना उधाण आले आहे.

जर राहुल बोंद्रे यांनी भाजपमध्ये प्रवेश केला, तर चिखली विधानसभा मतदारसंघातील राजकीय समीकरणांमध्ये मोठा बदल होण्याची शक्यता व्यक्त केली जात आहे. काँग्रेससाठी हा राजकीय धक्का ठरेल का, भाजपमध्ये त्यांच्या प्रवेशामुळे स्थानिक पातळीवर कोणती नवी समीकरणे तयार होतील आणि आगामी राजकारणावर त्याचा काय परिणाम होईल, याकडे आता सर्वांचे लक्ष लागले आहे.

१३ ऑगस्टच्या चर्चित तारखेला नेमके काय घडते आणि राहुल बोंद्रे आपली भूमिका स्पष्ट करतात का, याकडे चिखलीसह बुलढाणा जिल्ह्याचे राजकीय वर्तुळ लक्ष ठेवून आहे.