भागवतांच्या कार्यक्रमात अंबादास दानवेंची उपस्थिती; भाजप नेत्यांसोबत सहभोजनाने राजकीय चर्चांना उधाण

खामगाव येथील डॉ. प. पू. भय्यूजी महाराज प्रणित सूर्योदय पारधी समाज आदिवासी आश्रमशाळेच्या नवनिर्मित भव्य सभागृहाचा तसेच स्पोर्ट्स कॉम्प्लेक्सचा उद्घाटन सोहळा ८ ऑगस्ट रोजी पार पडला. या कार्यक्रमाला राष्ट्रीय स्वयंसेवक संघाचे सरसंघचालक मोहनजी भागवत प्रमुख उपस्थित होते.

आश्रमशाळेच्या परिसरात सुमारे १० हजार चौरस फुटांचे भव्य बंदिस्त सभागृह उभारण्यात आले आहे. तसेच तीन क्रीडांगणांचा समावेश असलेल्या स्पोर्ट्स कॉम्प्लेक्सचीही निर्मिती करण्यात आली आहे. या सुविधांच्या उद्घाटनासाठी विविध क्षेत्रातील मान्यवर उपस्थित होते.

👉 विशेष जाहिरात | अधिक माहितीसाठी क्लिक करा

या कार्यक्रमातील आ.अंबादास दानवे यांची उपस्थिती विशेष लक्षवेधी ठरली. मुख्य उद्घाटन सोहळ्याच्या वेळी ते सरसंघचालक मोहनजी भागवत यांच्यासोबत दिसून आले. यावेळी आ. संजय कुटे, ना. उईके आणि ना. फुंडकर यांच्यासह अन्य मान्यवर उपस्थित होते.

कार्यक्रमानंतर विशेष आमंत्रितांसाठी आयोजित करण्यात आलेल्या भोजनावेळीही आ. दानवे उपस्थित होते. त्यांनी इतर मान्यवरांसोबत सहभोजन केले. भाजपच्या आमदारांसोबत त्यांची झालेली ही उपस्थिती कार्यक्रमस्थळी चर्चेचा विषय बनली.

आ. दानवे हे भय्यूजी महाराजांचे भक्त

आ.अंबादास दानवे हे स्वर्गीय प. पू. भय्यूजी महाराजांचे भक्त असल्याचे सांगण्यात आले. याच पार्श्वभूमीवर त्यांना सद्गुरुदत्त धार्मिक व परमार्थिक ट्रस्टच्या अध्यक्ष डॉ. आयुषी देशमुख यांनी कार्यक्रमासाठी आवर्जून निमंत्रित केले होते. त्या निमंत्रणामुळेच दानवे कार्यक्रमाला उपस्थित राहिल्याची माहिती त्यांच्या स्वीय सहाय्यकांकडून देण्यात आली.

दरम्यान, कार्यक्रमातील आपल्या उपस्थितीबाबत माध्यमांनी विचारणा केली असता आ. अंबादास दानवे यांनी “मी सार्वजनिक कार्यक्रम म्हणून उपस्थित राहिलो,” असे उत्तर दिले.

त्यामुळे दानवेंच्या या उपस्थितीचा कोणताही राजकीय अर्थ काढण्यापूर्वी त्यांचे स्पष्टीकरणही महत्त्वाचे ठरते. मात्र, शिवसेना उबाठा गटाचे आमदार आणि भाजपचे प्रमुख नेते तसेच सरसंघचालक यांच्या उपस्थितीत झालेल्या या कार्यक्रमामुळे खामगावच्या राजकीय वर्तुळात या उपस्थितीची चर्चा रंगली आहे.