कोराडी प्रकल्पाच्या खदाणीत बुडून दोन चिमुकल्यांचा मृत्यू; देऊळगाव माळी परिसरावर शोककळा

मेहकर |समाधान सरकटे 

तालुक्यातील देऊळगाव माळी गावाजवळील कोराडी प्रकल्प परिसरात घडलेल्या हृदयद्रावक घटनेने संपूर्ण परिसर हादरला आहे. पाय धुण्यासाठी पाण्याजवळ गेलेल्या दोन चिमुकल्यांचा खोल खदाणीत बुडून मृत्यू झाल्याची घटना ८ ऑगस्ट रोजी सायंकाळी साडेपाच वाजेच्या सुमारास घडली. या घटनेने देऊळगाव माळी आणि लोणार परिसरात हळहळ व्यक्त होत आहे.

मिळालेल्या माहितीनुसार, आयान राजू शेख (वय अंदाजे १० वर्षे, रा. देऊळगाव माळी) आणि त्याचा मावस भाऊ आवेद इब्राहिम शेख (वय अंदाजे ११ वर्षे, रा. लोणार) हे शेख आसिफ शेख हुसेन यांच्यासोबत कोराडी धरण परिसरात आले होते.

धरणाच्या पाण्यालगत पाणीपुरवठ्यासाठी अंदाजे १५ बाय ४५ आकाराची खदान खोदण्यात आली आहे. या खदाणीत धरणाचे पाणी साचलेले असून पाण्याची खोली वरून सहज लक्षात येत नसल्याचे सांगण्यात येत आहे. पाय धुण्यासाठी गेलेल्या मुलांना पाण्याचा अंदाज आला नाही आणि ते अचानक खोल पाण्यात बुडू लागले.

खदाणीत आतून कपार असल्याने परिस्थिती आणखी धोकादायक बनली. मुलांना वाचविण्यासाठी शेख आसिफ शेख हुसेन यांनी शर्थीचे प्रयत्न केले. त्यांच्यासोबत असलेल्या एका मुलीला वाचविण्यात यश आले; मात्र आयान आणि आवेद ही दोन्ही मुले पाण्यात बुडाली.

घटनेची माहिती मिळताच गावातील नागरिकांनी घटनास्थळी धाव घेतली. स्थानिकांनी पाण्यात उतरून दोन्ही मुलांचा शोध घेण्याचा प्रयत्न केला; मात्र खदाणीत पाणी अत्यंत खोल असल्याने शोधकार्यात अडथळे निर्माण झाले.

घटनास्थळी पोलीस कर्मचारी, मंडळ अधिकारी तसेच स्थानिक ग्रामस्थ दाखल झाले असून मदत व बचावकार्य सुरू करण्यात आले. एनडीआरएफच्या विशेष पथकालाही घटनेची माहिती देण्यात आली. मात्र रात्रीच्या अंधारामुळे शोधमोहीम राबविण्यात अडचणी येण्याची शक्यता असल्याने सकाळी घटनास्थळी पोहोचून शोधकार्य सुरू करण्यात येईल, अशी माहिती पथक प्रमुखांकडून देण्यात आल्याचे सांगण्यात आले.

दरम्यान, या घटनेमुळे देऊळगाव माळी परिसरात शोककळा पसरली असून दोन्ही कुटुंबांवर दुःखाचा डोंगर कोसळला आहे. धरण, तलाव आणि पाणी साचलेल्या खदाणींच्या परिसरात लहान मुलांनी जाताना पालकांनी विशेष काळजी घ्यावी, अशी गरज या घटनेनंतर पुन्हा अधोरेखित झाली आहे.

• काजूकतलीचा बॉक्स उघडताच धक्का! बुरशीच्या थरात चक्क जिवंत अळ्या; बुलढाण्यात FDA पथकाची रिलायन्स मॉलवर धडक
• शेलसुरच्या सुपुत्राला कर्तव्यावर वीरमरण; हवालदार हरिदास कापसे यांचे उत्तराखंडमध्ये निधन
• धक्कादायक! पदभार सोडलेल्या अधिकाऱ्याच्या स्वाक्षरीवर ग्रामपंचायतीतून निधीची उचल?; गटविकास अधिकाऱ्याच्या भूमिकेवर प्रश्न

तुमच्या परिसरातील महत्त्वाची बातमी, फोटो किंवा व्हिडिओ Katta News पर्यंत पोहोचवा. स्थानिक घडामोडींच्या ताज्या आणि विश्वासार्ह अपडेट्ससाठी Katta News सोबत जोडलेले रहा.