बुलढाणा |समाधान सरकटे
राज्यातील पात्र शेतकऱ्यांसाठी महत्त्वाची बातमी आहे. एकात्मिक फलोत्पादन विकास अभियान अंतर्गत आर्थिक वर्ष २०२६-२७ साठी अनुसूचित जाती प्रवर्गातील पात्र शेतकऱ्यांकडून MahaDBT पोर्टलवर ऑनलाइन अर्ज मागविण्यात आले आहेत. विविध फलोत्पादन, संरक्षित शेती, कृषी यांत्रिकीकरण, शेततळे, मधुमक्षिका पालन, साठवणूक आणि प्रक्रिया प्रकल्पांसह एकूण २९ घटकांसाठी शासनाकडून ४० ते ५० टक्क्यांपर्यंत अर्थसहाय्य उपलब्ध होणार आहे.
या योजनेअंतर्गत फळबाग लागवड, ड्रॅगन फ्रूट, स्ट्रॉबेरी, द्राक्ष, केळी, पपई, अवोकॅडो, फुलशेती, मसाला पिके, औषधी व सुगंधी वनस्पती, रोपवाटिका, मशरूम उत्पादन, जुन्या फळबागांचे पुनरुज्जीवन, वैयक्तिक व सामूहिक शेततळे, हरीतगृह, शेडनेटगृह, प्लास्टिक मल्चिंग, तण नियंत्रण अच्छादन, मधुमक्षिका पालन, ट्रॅक्टर, पॉवर टिलर, विविध स्प्रेअर, फार्म गेट पॅक हाऊस, शीतगृह, शीतवाहन, प्राथमिक प्रक्रिया केंद्र तसेच कमी खर्चाचे कांदाचाळ व लसूण साठवणूक गृह अशा अनेक घटकांचा समावेश करण्यात आला आहे.
👉 विशेष जाहिरात | अधिक माहितीसाठी क्लिक करा
संबंधित योजनेनुसार पात्र लाभार्थ्यांना ४० ते ५० टक्क्यांपर्यंत अनुदान मिळणार असून काही घटकांसाठी प्रतियुनिट किंवा प्रतिहेक्टर लाखो रुपयांपर्यंत अर्थसहाय्य दिले जाणार आहे. अंतिम अनुदानाची रक्कम शासनाने निश्चित केलेल्या निकषांनुसार मंजूर केली जाणार असल्याचे कृषी विभागाने स्पष्ट केले आहे.
योजनेचा लाभ घेण्यासाठी लाभार्थ्यांनी MahaDBT पोर्टलवर ऑनलाइन अर्ज करणे आवश्यक आहे. अर्जाची निवड ‘प्रथम अर्ज, प्रथम लाभ’ या तत्त्वावर केली जाणार आहे. अर्ज करताना लाभार्थ्याकडे अनुसूचित जातीचे वैध जात प्रमाणपत्र तसेच Farmer ID असणे बंधनकारक आहे.
लाभार्थ्याचे काम पूर्ण झाल्यानंतर कृषी विभागाकडून प्रत्यक्ष पाहणी करण्यात येईल. पाहणी समाधानकारक झाल्यानंतर मंजूर अनुदानाची रक्कम थेट लाभार्थ्यांच्या बँक खात्यात जमा केली जाईल. संबंधित घटकासाठी यापूर्वी अर्ज केलेल्या शेतकऱ्यांनी पुन्हा अर्ज करण्याची आवश्यकता नसल्याचेही कृषी विभागाने स्पष्ट केले आहे.
योजनेबाबत अधिक माहितीसाठी शेतकऱ्यांनी आपल्या मंडळ कृषी अधिकारी, तालुका कृषी अधिकारी, उपकृषी अधिकारी किंवा सहाय्यक कृषी अधिकाऱ्यांशी संपर्क साधण्याचे आवाहन कृषी विभागाने केले आहे.
महत्त्वाच्या बाबी
- ✅ MahaDBT वर ऑनलाइन अर्ज सुरू
- ✅ अनुसूचित जाती प्रवर्गातील पात्र शेतकऱ्यांसाठी योजना
- ✅ २९ विविध कृषी घटकांचा समावेश
- ✅ ४०% ते ५०% पर्यंत अनुदान
- ✅ प्रथम अर्ज, प्रथम लाभ तत्त्व
- ✅ Farmer ID आणि जात प्रमाणपत्र आवश्यक
हे नककी करा..
शेतकरी बांधवांपर्यंत ही महत्त्वाची माहिती पोहोचवण्यासाठी ही बातमी जास्तीत जास्त शेअर करा. कृषी, शासन योजना आणि ब्रेकिंग अपडेट्ससाठी Kattanews.in ला नियमित भेट द्या.
Related News
