साखरखेर्ड्यात डिझेलसाठी हाहाकार! पेट्रोल पंपावर वाहनांसोबत ड्रम-कॅनच्या लांबच लांब रांगा

साखरखेर्डा, डिझेल तुटवडा, पेट्रोल पंप रांगा, शेतकरी संकट, ट्रॅक्टर चालक, इंधन टंचाई या मुद्द्यांमुळे सध्या संपूर्ण परिसरात चिंतेचे वातावरण निर्माण झाले आहे. साखरखेर्डा येथील दोन्ही पेट्रोल पंपांवर डिझेल आणि पेट्रोलसाठी वाहनांच्या लांबच लांब रांगा लागल्या असून अनेक नागरिक ड्रम आणि कॅन घेऊन तासनतास प्रतीक्षा करताना दिसत आहेत. इंधन वेळेवर मिळत नसल्याने शेतीची मशागत, नांगरणी आणि वखरपाळीची कामेही मोठ्या प्रमाणात रखडली आहेत.

गेल्या दोन महिन्यांपासून संपूर्ण देशात इंधन टंचाईचा परिणाम दिसून येत असून ग्रामीण भागात त्याचे गंभीर परिणाम जाणवत आहेत. सर्वाधिक फटका ट्रॅक्टर चालक आणि शेतकऱ्यांना बसत आहे. साखरखेर्डा येथे असलेल्या दोन पेट्रोल पंपांवर चार दिवसांनी एकदा पेट्रोल आणि डिझेलचा टँकर येत असल्याची माहिती समोर आली आहे. उपलब्ध साठ्यात सुमारे ३ हजार लिटर पेट्रोल आणि ९ हजार लिटर डिझेल असते; मात्र काही तासांतच इंधन संपल्याचे फलक लावण्याची वेळ पंप चालकांवर येत आहे.

👉 विशेष जाहिरात | अधिक माहितीसाठी क्लिक करा

आज दुपारी दोन्ही पेट्रोल पंपांवर मोठ्या प्रमाणात गर्दी दिसून आली. वाहनांसोबतच अनेक नागरिकांनी ड्रम आणि कॅन घेऊन रांगा लावल्या होत्या. पेट्रोल आणि डिझेल कधी उपलब्ध होणार याची ठोस माहिती वाहनधारकांना मिळत नसल्याने नागरिक दिवसभर पंप परिसरात थांबून राहत आहेत.

सकाळी दहा वाजण्याच्या सुमारास पाटील ब्रदर्स पेट्रोल पंपावर डिझेल आणि पेट्रोलचा साठा आल्यानंतर वाहनांची गर्दी आणखी वाढली. काही नागरिकांनी ड्रम आणि कॅन रांगेत ठेवले होते. मात्र पंप चालकांनी वाहनाशिवाय इतर कोणत्याही ड्रम किंवा कॅनमध्ये इंधन देण्यास नकार दिला. ओंकार पेट्रोल पंपावरही हाच नियम लागू करण्यात आला आहे. तरीदेखील ड्रम आणि कॅनची संख्या दिवसेंदिवस वाढत असल्याचे चित्र पाहायला मिळत आहे.

इंधन तुटवड्याचा थेट परिणाम शेतीच्या कामांवर होत आहे. मार्च आणि एप्रिल महिन्यात रब्बी हंगामातील पिकांची काढणी पूर्ण झाल्यानंतर आता मे महिन्यात मशागतीची कामे वेगाने सुरू झाली आहेत. नांगरणी आणि वखरपाळी वेळेत झाली नाही तर आगामी हंगामावर परिणाम होण्याची भीती शेतकऱ्यांकडून व्यक्त केली जात आहे.

ट्रॅक्टर चालकांकडून “आधी डिझेल द्या, पैसे नंतर द्या” अशी अट घालण्यात येत असल्यामुळे शेतकऱ्यांची अडचण आणखी वाढली आहे. परिणामी पेट्रोल पंपांवर ड्रम आणि कॅन घेऊन येणाऱ्यांची संख्या वाढत आहे. शासनाने फक्त वाहनांमध्येच इंधन देण्याचे आदेश दिल्यामुळे परिस्थिती आणखी गंभीर बनली आहे.

आता पेट्रोल आणि डिझेलचे वितरण पोलिस बंदोबस्तात होण्याची शक्यता व्यक्त केली जात असून अनेक वाहनधारक आणि शेतकऱ्यांची मोठी कोंडी होण्याची चिन्हे आहेत.

“पेट्रोल पंपावर काल रात्रीपासूनच वाहनांच्या रांगा लागल्या आहेत. इंधनाची आवक कमी झाल्याने प्रत्येकाला पेट्रोल आणि डिझेल मिळेल याची काळजी घेत मर्यादित वाटप करण्यात येत आहे.”

— अरविंद बेंदाडे आणि रविंद्र पाटील, पेट्रोल पंप चालक, साखरखेर्डा

Related News

• चिखलीत पोलिसांचा रात्रीचा धाडसी छापा! घरातून 2.78 किलो गांजा जप्त; राऊतवाडीत खळबळ
• रात्री १ वाजता काळाने गाठलं; भरधाव कारखाली दोन सुरक्षारक्षकांचा दुर्दैवी अंत
• सिंदखेडराजा तहसील कार्यालयाचा भोंगळ कारभार! जनरेटर बंद, लाईट गायब; नागरिक दिवसभर हेलपाटे