लोणावळा दुर्घटना : मेहकरच्या प्रज्वल गिरीचा दरीत कोसळून दुर्दैवी मृत्यू, सर्वत्र हळहळ

लोणावळा दुर्घटना पुन्हा एकदा मन हेलावून टाकणारी ठरली आहे.
बुलढाणा जिल्ह्यातील मेहकर येथील तरुण प्रज्वल वसंत गिरी यांचा
८ फेब्रुवारी रोजी लोणावळा येथे दरीत कोसळून दुर्दैवी मृत्यू झाला.
ही घटना समजताच मेहकरसह संपूर्ण जिल्ह्यात शोककळा पसरली आहे.
प्रज्वल गिरी हा पुणे येथे बी.एड. शिक्षणासोबत एमपीएससी परीक्षेची तयारी करत होता.

प्रज्वल गिरी हा प्रसिद्ध व्याख्याते, साहित्यिक व रंगकर्मी
प्रा. वसंत गिरी यांचा २६ वर्षीय एकुलता एक पुत्र होता.
८ फेब्रुवारी रोजी तो नातेवाईकांसोबत मुंबईहून पुण्याकडे प्रवास करत असताना
लोणावळा येथे अल्पोपहारासाठी थांबला होता.

यावेळी प्रज्वल व त्याचा मावसभाऊ टेकडीवरून थोडे फिरून येतो असे सांगून गेले.
मात्र तोल न सांभाळल्याने पाय घसरून प्रज्वल थेट खोल दरीत कोसळला.
या भीषण अपघातात त्याचा जागीच मृत्यू झाला.

प्रा. वसंत गिरी हे मेहकर एज्युकेशन सोसायटीच्या महाविद्यालयातून सेवानिवृत्त झाले असून
त्यांनी “तुमचं वऱ्हाड निघालं लंडनला” या गाजलेल्या एकपात्री प्रयोगाचे
महाराष्ट्रभर ५०० पेक्षा अधिक प्रयोग सादर केले आहेत.
तसेच क्रांतिकारकांच्या जीवनावर आधारित नाट्यप्रयोगांचे
हजारहून अधिक प्रयोग त्यांनी केले आहेत.

प्रज्वलच्या अकाली जाण्याने गिरी कुटुंबावर दुःखाचा डोंगर कोसळला आहे.
घटनेची माहिती मिळताच कुटुंबीय पुण्याकडे रवाना झाले होते.

प्रज्वल गिरी यांच्या पार्थिवावर १० फेब्रुवारी रोजी सकाळी १० वाजता
मेहकर येथील जानेफळ रोडवरील स्मशानभूमीत अंत्यसंस्कार करण्यात येणार आहेत.

या दुर्दैवी घटनेमुळे शैक्षणिक, साहित्यिक व सामाजिक क्षेत्रातून तीव्र दुःख व्यक्त
केले जात असून सर्वत्र हळहळ व्यक्त होत आहे.