भरधाव टेम्पोची धडक; माय-लेकाचा जागीच मृत्यू, एका कुटुंबावर दु:खाचा डोंगर

मेरा बु. येथील मुस्लीम कुंटूबातील रुखसाना बी इसा शहा (वय ६५) व त्यांचा मुलगा इनुस शहा इसा शहा (वय ४२) हे दोघे चांडोळ गावात मजुरीचे काम आटोपून मोटारसायकलवरून घरी परत येत होते.

दरम्यान समोरून भंगार भरलेला सुप्रो कंपनीचा टेम्पो (क्र. MH 25 AJ 489) भरधाव वेगाने येत असल्याचे दिसताच इनुस शहा यांनी मोटारसायकल रस्त्याच्या कडेला थांबवली. मात्र टेम्पो चालकाचे वाहनावरील नियंत्रण सुटले आणि टेम्पोने थेट धडक देत माय-लेकावर पलटी मारली.

अपघात इतका भीषण होता की, इनुस शहा यांचा एक हात तुटून त्यांचा जागीच मृत्यू झाला. तर त्यांची आई रुखसाना बी शहा वाहनाखाली दबल्या गेल्या.

घटनेची माहिती मिळताच स्थानिक नागरिकांनी तात्काळ मदत करत दोघांना चिखली येथील सावळे रुग्णालयात हलवले. मात्र डॉक्टरांनी इनुस शहा यांना मृत घोषित केले. रुखसाना बी शहा यांची प्रकृती गंभीर असल्याने नगर येथे रेफर करण्यात आले. उपचार सुरू असतानाच नगर येथे त्यांचीही प्राणज्योत मालवली.

विशेष म्हणजे याच कुटुंबावर एका वर्षापूर्वीच पती व एका मुलाचा मृत्यू झाल्याची दुर्दैवी घटना घडली होती. आता माय-लेकाच्या अपघाती मृत्यूमुळे संपूर्ण मेरा बु. गावात शोककळा पसरली आहे.

या प्रकरणी वृत्त लिहेपर्यंत पोलिसांत गुन्हा दाखल झाला नव्हता. ही माहिती मृतकांचे नातेवाईक सांडू शहा, युसुफ तांबोळी व बिसमिल्ला आतार यांनी दिली.

👉 हे पण वाचा 

• चिखली तालुक्यातील घटना लग्नाचे आमिष, नंतर नकार; धक्कादायक! २० वर्षीय तरुणीची आत्महत्या
• राष्ट्रध्वजाला मानवंदना देतानाच शाळेच्या मुख्याध्यापकाचा मृत्यू; मोहेगाव गावावर शोककळा
• हे धाडस नाही, ही मजबुरी आहे! बाप आजारी म्हणून ई-पीक नोंदीसाठी १४ वर्षांचा मुलगा रात्री शेतात

📢 Katta News सोबत राहा – ग्रामीण, सामाजिक आणि वास्तव बातम्यांसाठी.