महाराष्ट्रात पुन्हा एकदा हवामानाचा रंग बदलताना दिसतोय. गेल्या काही दिवसांपासून ऊन आणि ढग यांचा लपंडाव सुरू असतानाच आता राज्यात पुन्हा पावसाची हजेरी लागण्याची शक्यता हवामान विभागाने व्यक्त केली आहे.
अरबी समुद्रात निर्माण झालेल्या कमी दाबाच्या क्षेत्रामुळे पुढील पाच दिवस महाराष्ट्राच्या अनेक भागांमध्ये गडगडाटासह पाऊस पडेल, असा अंदाज वर्तवण्यात आला आहे.
कोकण, मध्य महाराष्ट्र, मराठवाडा आणि काही विदर्भातील भागांसाठी येलो अलर्ट जारी करण्यात आला असून, शेतकऱ्यांनी पुढील काही दिवस हवामानाचा अंदाज लक्षात घेऊन आपल्या शेतीच्या नियोजनात बदल करावेत, असा सल्ला हवामान विभागाकडून देण्यात आला आहे.
कोकणात व मध्यम महाराष्ट्रात पावसाची शक्यता वाढली
पूर्व-मध्य अरबी समुद्रात तीव्र कमी दाबाचे क्षेत्र निर्माण झाले आहे. त्यामुळे कोकण किनारपट्टी, पुणे, सातारा, कोल्हापूर, सांगली आणि रत्नागिरी या भागांमध्ये ढगाळ वातावरण राहणार असून अधूनमधून गडगडाटासह पाऊस पडेल, असा अंदाज हवामान विभागाने वर्तवला आहे.मुंबई आणि ठाणे परिसरात शनिवारी व रविवारी पावसाची शक्यता आहे. तर मराठवाड्यात छत्रपती संभाजीनगर, लातूर, बीड आणि नांदेड जिल्ह्यांमध्ये अधूनमधून हलका ते मध्यम पाऊस पडण्याची शक्यता आहे.
हवामान विभागाचा अलर्ट – कोणत्या दिवशी कुठे पाऊस?
📅 २५ ऑक्टोबर: नाशिक, पुणे, जळगाव, बीड, सोलापूर, सांगली, बुलढाणा, लातूर
📅 २६ ऑक्टोबर: मुंबई, पुणे, सातारा, कोल्हापूर, नांदेड, संभाजीनगर
📅 २७ ऑक्टोबर: धुळे, नाशिक, रत्नागिरी, सातारा, कोल्हापूर
📅 २८ ऑक्टोबर: पुणे, सांगली, रत्नागिरी, रायगड, कोल्हापूर आणि नांदेड
शेतकऱ्यांसाठी महत्त्वाच्या सूचना
हवामानातील बदल लक्षात घेता पुढील काही दिवस शेतीविषयक कामकाजात सावधगिरी बाळगणं आवश्यक आहे.पिकांवर अनावश्यक फवारणी टाळा.काढणी झालेली पिकं किंवा भाजीपाला सुरक्षित ठिकाणी साठवा.जनावरांना वीजेच्या गडगडाटापासून दूर ठेवा.विजेच्या तारांच्या खाली थांबणं टाळा.पाण्याचा निचरा व्यवस्थित होईल याची काळजी घ्या.
हवामान बदलाचा शेतीवर परिणाम
गेल्या काही दिवसांपासून महाराष्ट्रात हवामान स्थिर होत असताना पुन्हा एकदा या पावसामुळे शेतकऱ्यांना थोडीशी चिंता निर्माण झाली आहे. खरीप हंगामातील शेवटच्या टप्प्यातील पिकांवर पावसाचा परिणाम होऊ शकतो. काही भागांमध्ये ओल्या हवामानामुळे रोगराईचा धोका वाढू शकतो.हवामान तज्ञांच्या मते, अरबी समुद्रातील कमी दाबाचं क्षेत्र पुढील काही दिवसांत उत्तरेकडे सरकेल, त्यामुळे पाऊस थोड्या प्रमाणात सर्वदूर पसरू शकतो.
