वरोडी (ता. सिंदखेडराजा) |१६ मार्च २०२६
बुलढाणा जिल्ह्यातील सिंदखेडराजा तालुक्यातील वरोडी येथे महावितरणच्या वीज लाईनमुळे झालेल्या शॉर्टसर्किटमुळे एका शेतकऱ्याचे मोठे नुकसान झाले आहे. वरोडी गावाजवळील शेतात लागलेल्या आगीत विधवा शेतकरी दुर्गाबाई संतोष गारोळे यांच्या १ एकर गव्हाचे पीक पूर्णपणे जळून खाक झाले. अचानक लागलेल्या या आगीमुळे परिसरातील शेतकरी वर्गात चिंता व्यक्त होत आहे.
मिळालेल्या माहितीनुसार, वरोडी गावाच्या पश्चिम बाजूला दुर्गाबाई संतोष गारोळे यांचे “पांढरी” नावाचे सुमारे एक एकर शेत आहे. या शेतातून महावितरणची तीन फेज वीज लाईन गेलेली आहे. आज दुपारी सुमारे ३ वाजताच्या दरम्यान या वीज लाईनमधून ठिणगी पडून शॉर्टसर्किट झाल्याची घटना घडली.
या ठिणगीमुळे शेतातील उभ्या गव्हाच्या पिकाला अचानक आग लागली. काही क्षणातच आग वेगाने पसरत गेली आणि पूर्ण एक एकरातील गहू जळून खाक झाला. आग लागल्याचे लक्षात येताच परिसरातील ग्रामस्थांनी तात्काळ धाव घेत आग विझवण्याचा प्रयत्न केला. मात्र तोपर्यंत संपूर्ण पीक आगीत भस्मसात झाले होते.
दुर्गाबाई संतोष गारोळे या विधवा महिला असून त्यांच्या कुटुंबाचा उदरनिर्वाह मुख्यतः शेतीवर अवलंबून आहे. गव्हाचे पीक जळून गेल्यामुळे त्यांच्या कुटुंबावर आर्थिक संकट कोसळले आहे.
हे पण वाचा..
या घटनेची तात्काळ दखल घेऊन संबंधित प्रशासनाने पंचनामा करावा तसेच नुकसानग्रस्त शेतकरी कुटुंबाला शासनाकडून तातडीने आर्थिक मदत देण्यात यावी, अशी मागणी गावकऱ्यांकडून करण्यात येत आहे.
Related News :
- मोहाडी शिवारात बिबट्याचा थरार! नीलगाईवर हल्ला; मादी बिबट्या व दोन पिल्लांचा वावर
- लोणारमध्ये संतापजनक प्रकार! ६० वर्षीय मातंग महिलेवर मारहाण व विनयभंग; रमेशआण्णा मुळेवर अॅट्रॉसिटी गुन्हा
हे आवश्यक करा
अशाच स्थानिक आणि ताज्या बातम्यांसाठी Kattanews.in ला नियमित भेट द्या.
