एमओ’कडून आर्थिक लूट! कॅन्सरग्रस्त कर्मचाऱ्याच्या उपचार बिलासाठी ३० हजारांची लाच; वरवंड PHC मधील धक्कादायक प्रकार.

१८ डिसेंबर रोजी कारंजा चौकातील एका मोबाइल शॉपीवर पैसे आणून देण्यास सांगण्यात आल्याचेही सूत्रांकडून समजते. यानंतर व्हॉट्सअॅप कॉलद्वारेही मानसिक दबाव टाकण्यात आल्याचा आरोप पीडित कर्मचाऱ्याने केला आहे.

कॅन्सरवरील उपचारासाठी आतापर्यंत जवळपास ५० लाख रुपयांचा खर्च झाल्याचे सांगण्यात येत आहे. छत्रपती संभाजीनगर, मुंबईतील नामांकित रुग्णालयांमध्ये उपचार घेऊनही हा कर्मचारी आज आर्थिक विवंचनेत सापडला आहे.

“जर आरोग्य विभागातील कर्मचाऱ्यांची ही अवस्था असेल, तर सामान्य नागरिकांचे काय?” असा सवाल उपस्थित होत असून, आरोग्य विभागातील लाचखोरी पुन्हा एकदा चर्चेत आली आहे.

या प्रकरणी जिल्हा आरोग्य अधिकाऱ्यांशी संपर्क साधला असता, “संपूर्ण प्रकरणाची चौकशी करून दोषी आढळल्यास कठोर कारवाई केली जाईल,” असे त्यांनी स्पष्ट केले आहे.