खामगाव–नांदुरा महामार्गावर काळजाचा थरार! अज्ञात वाहनाच्या धडकेत माय-लेकीचा जागीच मृत्यू

या दुचाकी अपघात प्रकरणात पती गंभीर जखमी झाला असून परिसरात शोककळा पसरली आहे.

👉 विशेष जाहिरात | अधिक माहितीसाठी क्लिक करा

नांदुरा तालुक्यातील नारायणपूर (निमगाव) येथील रहिवासी दिलीप प्रभाकर बोंबटकार (वय ३५), त्यांची पत्नी सौ. शितल दिलीप बोंबटकार (वय ३०) आणि त्यांची तीन वर्षांची मुलगी कु. श्रावणी हे दुचाकी क्रमांक एमएच २८ एच १५६५ ने नांदुराहून खामगावकडे जात होते.

खामगाव–नांदुरा राष्ट्रीय महामार्गावरील आमसरी फाट्यानजीक अचानक एका अज्ञात वाहनाने दुचाकीला जोरदार धडक दिली. या भीषण धडकेत सौ. शितल बोंबटकार आणि चिमुकली श्रावणी यांचा जागीच मृत्यू झाला, तर दिलीप बोंबटकार हे गंभीर जखमी झाले.

अपघातानंतर संबंधित अज्ञात वाहन चालक घटनास्थळावरून फरार झाला. घटनेची माहिती मिळताच जलंब पोलीस ठाण्याचे अधिकारी व कर्मचारी घटनास्थळी दाखल झाले.

तसेच ओम साई फाउंडेशनचे विलास निंबोळकर, अश्विन फेरण, गणेश वनारे आदींनी तत्काळ मदतकार्य करत जखमीला रुग्णवाहिकेद्वारे रुग्णालयात दाखल केले.

या दुर्दैवी घटनेमुळे परिसरात हळहळ व्यक्त होत असून राष्ट्रीय महामार्गावरील अपघातांचे प्रमाण वाढत असल्याबद्दल नागरिकांमध्ये तीव्र संताप व्यक्त केला जात आहे.