साखरखेर्ड्यात विद्यार्थ्यांसाठी विशेष जनजागृती अभियान; सोशल मीडिया, व्यसन आणि ऑनलाइन फसवणुकीबाबत पोलिसांचे मार्गदर्शन

साखरखेर्डा | समाधान सरकटे 

मोबाईल आणि सोशल मीडियाचा वापर विद्यार्थ्यांच्या दैनंदिन जीवनाचा महत्त्वाचा भाग झाला आहे. शिक्षण आणि माहिती मिळवण्यासाठी त्याचा उपयोग होत असला, तरी सोशल मीडियाचा अतिरेक, चुकीचे ऑनलाइन संपर्क, ऑनलाइन फसवणूक तसेच व्यसनांच्या वाढत्या धोक्यामुळे विद्यार्थ्यांमध्ये जनजागृती करण्याची गरज निर्माण झाली आहे. याच पार्श्वभूमीवर साखरखेर्ड्यात विद्यार्थ्यांसाठी विशेष जनजागृती अभियान राबविण्यात येणार आहे.

लोकसेवा आयुर्वेदिक नशामुक्ती केंद्र, साखरखेर्डाचे संचालक राधेश्याम बंगाळे यांच्या संकल्पनेतून ५ ऑक्टोबर २०२६ पासून ‘नशामुक्ती व सोशल मीडिया जनजागृती अभियान’ सुरू करण्यात येणार आहे. या अभियानाच्या माध्यमातून शाळा आणि महाविद्यालयातील विद्यार्थी-विद्यार्थिनींना सोशल मीडियाचा सुरक्षित वापर, ऑनलाइन फसवणुकीपासून बचाव आणि व्यसनांपासून दूर राहण्याबाबत मार्गदर्शन केले जाणार आहे.

सोशल मीडियाच्या माध्यमातून विद्यार्थ्यांच्या अनेक नवीन व्यक्तींशी ओळखी होतात. काही वेळा या ऑनलाइन ओळखी भावनिक संबंधांमध्ये बदलतात आणि त्यातून विद्यार्थ्यांना विविध अडचणींचा सामना करावा लागू शकतो. चुकीच्या ऑनलाइन संपर्कामुळे फसवणूक होण्याची शक्यताही असते. त्यामुळे अनोळखी व्यक्तींशी संवाद साधताना कोणती काळजी घ्यावी, वैयक्तिक माहिती शेअर करण्याचे धोके काय आहेत आणि अडचण आल्यास पालक, शिक्षक किंवा पोलिसांची मदत कशी घ्यावी, याबाबत विद्यार्थ्यांना जागरूक केले जाणार आहे.

यासोबतच ऑनलाइन माध्यमातून व्यसनाधीन करणाऱ्या पदार्थांशी संबंधित माहिती किंवा संपर्क विद्यार्थ्यांपर्यंत पोहोचण्याची शक्यता लक्षात घेऊन व्यसनमुक्तीवरही अभियानात विशेष भर देण्यात येणार आहे. गांजा, तंबाखू आणि इतर मादक पदार्थांच्या सेवनामुळे होणारे शारीरिक, मानसिक आणि सामाजिक दुष्परिणाम विद्यार्थ्यांना समजावून सांगण्यात येणार आहेत.

सोशल मीडियाचा अतिरेक टाळणे, संशयास्पद लिंक किंवा संदेशांपासून सावध राहणे, ऑनलाइन ओळखींबाबत योग्य ती खबरदारी घेणे आणि कोणत्याही प्रकारच्या दबावाला किंवा फसवणुकीला बळी न पडणे, याबाबतही विद्यार्थ्यांना मार्गदर्शन करण्यात येणार आहे.

या अभियानाच्या आयोजनासाठी लोकसेवा आयुर्वेदिक नशामुक्ती केंद्राचे संचालक राधेश्याम बंगाळे यांनी साखरखेर्डा पोलीस स्टेशनचे ठाणेदार युवराज रबडे यांना निवेदन देऊन सहकार्याची विनंती केली आहे. तसेच मुख्याध्यापक ठाकूर सर, कुले सर आणि भावसार सर यांची भेट घेऊन शाळा-महाविद्यालयांमध्ये जनजागृती कार्यक्रम राबविण्यासाठी सहकार्याची विनंती करण्यात आली.

या अभियानात साखरखेर्डा पोलीस स्टेशनचे ठाणेदार युवराज रबडे हे प्रमुख मार्गदर्शक म्हणून विद्यार्थ्यांशी संवाद साधणार आहेत. व्यसनमुक्ती, सोशल मीडिया वापरताना घ्यावयाची खबरदारी, ऑनलाइन फसवणुकीपासून संरक्षण आणि विद्यार्थ्यांची सुरक्षितता या विषयांवर विद्यार्थ्यांना मार्गदर्शन केले जाणार आहे.

विद्यार्थ्यांनी आधुनिक तंत्रज्ञानाचा वापर शिक्षण आणि ज्ञानवृद्धीसाठी करावा, सोशल मीडियाच्या अतिरेकापासून दूर राहावे आणि संशयास्पद ऑनलाइन संपर्क किंवा फसवणुकीची परिस्थिती निर्माण झाल्यास तातडीने पालक, शिक्षक किंवा विश्वासू व्यक्तीची मदत घ्यावी, हा संदेश या अभियानातून देण्यात येणार आहे.