पूर्णा नदीत पोहायला गेलेल्या दोन अल्पवयीन मुलांचा बुडून दुर्दैवी मृत्यू; नांदुर्यात शोककळा

पोलिसांनी दिलेल्या माहितीनुसार, नांदुरा येथील वार्ड क्रमांक १ मधील प्रतिक शिवा वानखडे (वय १२) आणि कृष्णा बाळू भोपळे (वय १४) हे दोघे सकाळी साडेनऊच्या सुमारास पूर्णा नदीवर पोहण्यासाठी गेले होते. नदीतील पाण्याची खोली आणि प्रवाहाचा योग्य अंदाज न आल्याने दोघेही पाण्यात बुडाले.

👉 विशेष जाहिरात | अधिक माहितीसाठी क्लिक करा

घटनेची माहिती मिळताच परिसरातील नागरिकांनी मदतीसाठी धाव घेतली. त्यानंतर ओम साई फाउंडेशनच्या बचाव पथकाने तत्काळ घटनास्थळी पोहोचून शोधमोहीम सुरू केली. काही वेळाच्या प्रयत्नांनंतर दोन्ही मुलांना नदीतून बाहेर काढण्यात आले.

दोघांनाही तातडीने प्राथमिक आरोग्य केंद्रात उपचारासाठी दाखल करण्यात आले. मात्र तपासणीनंतर वैद्यकीय अधिकाऱ्यांनी त्यांना मृत घोषित केले. या घटनेमुळे रुग्णालय परिसरातही शोककळा पसरली होती.

पोलिसांनी या प्रकरणी आकस्मिक मृत्यूची नोंद केली असून पुढील तपास सुरू आहे. शवविच्छेदनाची प्रक्रिया पूर्ण झाल्यानंतर मृतदेह नातेवाईकांच्या ताब्यात देण्यात आले. रविवारी संध्याकाळी अत्यंत शोकाकुल वातावरणात दोघांवर अंत्यसंस्कार करण्यात आले.

या दुर्घटनेनंतर नदी, तलाव किंवा धरण परिसरात पोहताना विशेष काळजी घेण्याचे आवाहन स्थानिक प्रशासन आणि नागरिकांकडून करण्यात येत आहे. विशेषतः पावसाळ्यात नदीतील पाण्याची पातळी, प्रवाह आणि खोली यांचा अचूक अंदाज येत नसल्याने अशा घटना टाळण्यासाठी पालकांनी मुलांवर लक्ष ठेवण्याची गरज व्यक्त होत आहे.