अमडापूर ,प्रतिनिधी|विशाल गवई
बुलढाणा जिल्ह्यातील अमडापूर पोलीस स्टेशनने अवैध हातभट्टी दारू निर्मितीविरोधात मोठी कारवाई करत डोंगरशेवली शिवारातील जंगल परिसरात सुरू असलेला हातभट्टी दारूचा अड्डा उद्ध्वस्त केला. गोपनीय माहितीच्या आधारे करण्यात आलेल्या या कारवाईत दोन महिलांविरुद्ध महाराष्ट्र दारूबंदी कायद्यान्वये गुन्हा दाखल करण्यात आला असून हातभट्टी दारू, साहित्य आणि सडावा नष्ट करण्यात आला आहे. या धडक कारवाईमुळे परिसरातील अवैध दारू व्यवसाय करणाऱ्यांमध्ये मोठी खळबळ उडाली आहे.
पोलीस स्टेशन अमडापूरला डोंगरशेवली शिवारातील दरी-खोऱ्यात जंगलामध्ये अवैध हातभट्टी दारू गाळण्याचे काम सुरू असल्याची गोपनीय माहिती मिळाल्यानंतर ठाणेदार जयसिंग राजपूत यांनी तात्काळ विशेष पथकासह घटनास्थळी धाड टाकली. पोलिसांनी परिसराची पाहणी केली असता हातभट्टी दारू तयार करण्यासाठी वापरण्यात येणारे साहित्य, तयार दारू तसेच सडावा आढळून आला. यानंतर संपूर्ण अड्डा उद्ध्वस्त करून अवैध दारू आणि सडावा जागीच नष्ट करण्यात आला.
कारवाईदरम्यान रेखाबाई सुनील पवार (रा. डोंगरखंडाळा, ता. चिखली) यांच्या ताब्यातून १४ लिटर हातभट्टी दारू व इतर साहित्य असा सुमारे ३,४३० रुपयांचा मुद्देमाल जप्त करण्यात आला. तसेच मंगलाबाई गणेश पवार (रा. डोंगरखंडाळा, ता. चिखली) यांच्या ताब्यातून १४ लिटर हातभट्टी दारू व इतर साहित्य असा सुमारे ३,६५० रुपयांचा मुद्देमाल जप्त करण्यात आला. पोलिसांनी जप्त केलेली हातभट्टी दारू आणि सडावा नियमानुसार नष्ट केला.
या प्रकरणी दोन्ही महिला आरोपींविरुद्ध अमडापूर पोलीस स्टेशनमध्ये महाराष्ट्र दारूबंदी कायद्यान्वये गुन्हे दाखल करण्यात आले आहेत. पुढील तपास एएसआय निवृत्ती चेके करीत आहेत.
ही कारवाई अमडापूर पोलीस स्टेशनचे ठाणेदार जयसिंग राजपूत यांच्या नेतृत्वाखाली पार पडली. या मोहिमेत एएसआय निवृत्ती चेके, पोलीस हवालदार बिलगे, पोलीस शिपाई चंद्रशेखर मुरडकर, दुर्गासिंग ठाकूर, रंजीत सरोदे, चालक चिंचोले तसेच महिला अंमलदार वैशाली आराख यांनी सहभाग घेतला. अवैध व्यवसायांविरोधात अशीच कठोर कारवाई पुढेही सुरू राहणार असल्याचे पोलिसांनी स्पष्ट केले.
📢 KattaNews.in ला फॉलो करा
बुलढाणासह महाराष्ट्रातील ब्रेकिंग न्यूज, गुन्हे, शेती, सरकारी योजना, राजकारण, रोजगार आणि स्थानिक घडामोडींचे सर्वात वेगवान आणि विश्वासार्ह अपडेट्स मिळवण्यासाठी KattaNews.in नियमित वाचा.
