पूर्णा नदीत अवैध वाळू वाहतुकीवर प्रशासनाचा घाव; ८ टिप्पर जप्त, १.६२ कोटींचा मुद्देमाल ताब्यात

जिल्हाधिकारी डॉ. किरण पाटील यांच्या आदेशानुसार आणि उपविभागीय अधिकारी संतोष शिंदे यांच्या मार्गदर्शनाखाली
पोलीस व महसूल विभागाच्या संयुक्त पथकाने ही धडक कारवाई केली.
दि. २४ डिसेंबर २०२५ रोजी सायंकाळी एमआयडीसी मलकापूर पोलीस स्टेशन हद्दीतील नरवेल कोटेश्वर मंदिर शिवारात
पेट्रोलिंगदरम्यान जमुनापुरी घाटातून अवैध वाळू वाहतूक सुरू असल्याची खात्रीलायक माहिती मिळाली होती.

माहितीच्या आधारे नाकाबंदी करण्यात आली असता संशयास्पद ८ टिप्पर वाहने थांबवण्यात आली.
तपासणीदरम्यान चालकांकडे वाळू वाहतुकीसाठी कोणतीही वैध परवानगी नसल्याचे स्पष्ट झाले.
पंचासमक्ष तपासणीमध्ये प्रत्येकी सुमारे २ ब्रॉस वाळूप्रमाणे एकूण १६ ब्रॉस वाळू (अंदाजे किंमत २ लाख रुपये)
आणि प्रत्येकी सुमारे २० लाख रुपये किमतीची ८ टिप्पर वाहने जप्त करण्यात आली.

या प्रकरणी पोलीस स्टेशन एमआयडीसी मलकापूर येथे गुन्हा अप. क्र. १७५/२०२५ अन्वये
भा.न्या.सं. कलम ३०३(२) तसेच गौण खनिज अधिनियम २१(१), २१(२) अंतर्गत
८ आरोपींवर गुन्हा दाखल करण्यात आला आहे. आरोपींमध्ये मलकापूर, नांदुरा व मोताळा येथील व्यक्तींचा समावेश आहे.

जप्त टिप्पर वाहनांचे क्रमांक MH-28-BB-6174, 2895, 4414, 4172, 1210, 8910, 7935 व 7397 असे आहेत.
या प्रकरणाचा पुढील तपास पोलीस करीत असून, अवैध गौण खनिज उत्खनन व वाहतुकीविरोधात
यापुढेही कठोर कारवाई सुरू राहील, असा इशारा प्रशासनाने दिला आहे.