चिखली |६ फेब्रुवारी २०२६
नागपूरमध्ये PG करणाऱ्या एका तरुण डॉक्टरच्या आत्महत्येने संपूर्ण वैद्यकीय वर्तुळ हादरून गेले आहे. नागपूर येथील शासकीय वैद्यकीय महाविद्यालय व रुग्णालयाच्या (मेडिकल) नेत्ररोग विभागातील २६ वर्षीय निवासी डॉक्टरने सोमवारी सकाळी शहरातील एका हॉटेलमध्ये गळफास घेऊन आत्महत्या केल्याची धक्कादायक घटना समोर आली आहे.
कॉलेजजवळील गणेशपेठ मध्यवर्ती बसस्थानक परिसरातील एका हॉटेलमध्ये ऋत्विक वास्तव्यास होता. सोमवारी तो कॉलेजला गैरहजर राहिल्याने विभागप्रमुखांनी त्याच्या वडिलांशी संपर्क साधला. वडिलांनी वारंवार फोन करूनही मुलाकडून कोणताही प्रतिसाद मिळाला नाही. त्यामुळे हॉटेल व्यवस्थापनाशी संपर्क साधण्यात आला.
हॉटेल कर्मचाऱ्यांनी खोलीचा दरवाजा ठोठावला; मात्र आतून कोणताही प्रतिसाद मिळाला नाही. संशय बळावल्यानंतर गणेशपेठ पोलिसांना पाचारण करण्यात आले. पोलिसांनी दरवाजा तोडून आत प्रवेश केला असता ऋत्विक ठाकूर यांनी गळफास घेतल्याचे आढळून आले.
प्राथमिक तपासात कोणतीही सुसाइड नोट आढळून आलेली नाही. आत्महत्येमागील नेमके कारण अद्याप स्पष्ट झालेले नसून गणेशपेठ पोलीस विविध अंगांनी तपास करीत आहेत. तरुण डॉक्टरच्या मृत्यूने वैद्यकीय क्षेत्रातील मानसिक ताणतणाव आणि दबाव पुन्हा एकदा ऐरणीवर आला आहे.
👉 वाचकांसाठी आवाहन :
जर तुम्ही किंवा तुमच्या ओळखीतील कोणी मानसिक तणावाखाली असेल, तर मदत घेण्यास अजिबात संकोच करू नका. वेळेवर संवाद आणि आधार जीवन वाचवू शकतो.
Related News
