महावितरणचा धक्कादायक प्रकार! नागरिकांची परवानगी न घेता घरोघरी जबरदस्ती स्मार्ट मीटर – आदेश कुणाचा?

स्मार्ट मीटर बसवल्यानंतर अनेक ठिकाणी वीज बिल दुप्पट झाल्याच्या तक्रारी समोर आल्या आहेत. याचा थेट फटका गरीब, शेतकरी, मजूर आणि मध्यमवर्गीय कुटुंबांना बसत आहे. आधीच महागाईने हैराण झालेल्या जनतेसाठी वाढलेली वीज बिले मोठे आर्थिक संकट ठरत आहेत.

याचबरोबर स्मार्ट मीटरमुळे घरगुती दळणाचे दर प्रति किलो पाच रुपये झाले असून, हा अप्रत्यक्ष खर्च सामान्य नागरिकांच्या खिशावर अतिरिक्त भार टाकणारा ठरत आहे. अकोला, वाशिम व बुलढाणा हे जिल्हे आर्थिकदृष्ट्या मागासलेले असल्याने येथे अशा योजना लादण्याबाबत प्रश्न उपस्थित होत आहेत.

ग्राहक व सामाजिक संघटनांनी या प्रकरणी सरकारकडे थेट सवाल उपस्थित केले आहेत. ग्राहकांच्या संमतीशिवाय मीटर बसवण्याचा अधिकार कुणी दिला, वाढलेल्या बिलांच्या तक्रारींकडे दुर्लक्ष का केले जात आहे, आणि मागास जिल्ह्यांनाच लक्ष्य का केले जात आहे, असे प्रश्न उपस्थित होत आहेत.

या संपूर्ण प्रकरणाकडे राज्य सरकारने तातडीने लक्ष देऊन स्मार्ट मीटर बसवणी थांबवावी व नागरिकांच्या तक्रारींची सखोल चौकशी करावी, अशी जोरदार मागणी होत आहे. अन्यथा येत्या काळात तीव्र जनआंदोलन छेडले जाईल, असा इशाराही देण्यात आला आहे.