मागासवर्गीय शेतकरी व महिलांसाठी सुवर्णसंधी! 5 HP मोटार पंप व शिलाई मशीन 100% अनुदानावर

On: January 4, 2026 4:46 PM

मागासवर्गीय शेतकरी व महिलांसाठी 5 HP मोटार पंप व शिलाई मशीन 100 टक्के अनुदान योजना बुलढाणा जिल्हा परिषद

समाधान सरकटे/प्रतिनिधी

बुलढाणा : मागासवर्गीय शेतकरी व महिलांसाठी सुवर्णसंधी उपलब्ध झाली असून जिल्हा परिषद बुलढाणा अंतर्गत समाजकल्याण विभागाच्या 20 टक्के सेसफंड योजनेतून मागासवर्गीय शेतकरी व महिलांसाठी 100% अनुदान देण्यात येत आहे. या योजनेअंतर्गत मागासवर्गीय शेतकरी व महिलांसाठी 5 HP क्षमतेचा विद्युत मोटार पंप तसेच मागासवर्गीय महिलांसाठी शिलाई मशीन 100 टक्के अनुदानावर पुरविण्यात येणार आहे. अधिकाधिक मागासवर्गीय शेतकरी व महिलांनी या योजनेचा लाभ घ्यावा, असे आवाहन प्रशासनाकडून करण्यात आले आहे.ही योजना सन 2025-26 या आर्थिक वर्षासाठी राबविण्यात येत असून, यासाठी इच्छुक व पात्र लाभार्थ्यांना अर्ज सादर करण्यास मुदतवाढ देण्यात आली आहे. यामुळे जिल्ह्यातील अनेक गरजू कुटुंबांना दिलासा मिळणार आहे.

योजनेसाठीचे अर्ज पंचायत समिती स्तरावर उपलब्ध करून देण्यात आले असून, सर्व आवश्यक कागदपत्रांसह परिपूर्ण अर्ज सादर करणे बंधनकारक आहे. जास्तीत जास्त पात्र लाभार्थ्यांना या योजनेचा लाभ मिळावा या उद्देशाने अर्ज करण्याची अंतिम तारीख वाढविण्यात आली आहे.

मागासवर्गीय शेतकऱ्यांनी 5 HP विद्युत मोटार पंप योजनेसाठी, तर मागासवर्गीय महिलांनी शिलाई मशीन योजनेसाठी आपले अर्ज संबंधित पंचायत समिती कार्यालयातील गट विकास अधिकारी यांच्याकडे 15 जानेवारी 2026 पर्यंत सादर करावेत.

या संदर्भात जिल्हा परिषदेचे मुख्य कार्यकारी अधिकारी गुलाब खरात यांनी पात्र लाभार्थ्यांना आवाहन केले असून, अतिरिक्त मुख्य कार्यकारी अधिकारी बी. एम. मोहन व जिल्हा समाजकल्याण अधिकारी प्रमोद यंडोले यांनी अधिक माहितीसाठी पंचायत समिती कार्यालयाशी संपर्क साधण्याचे आवाहन केले आहे.