किनगाव जट्टू, बीबी परिसरात आरटीओची धडक; ४ वाहनांवर कारवाई, १.३६ लाखांचा दंड

सिंदखेडराजा | समाधान सरकटे

किनगाव जट्टू आणि बीबी परिसरातील रेती वाहतुकीवर प्रशासनाने कारवाईचा बडगा उगारला आहे. खापरखेड, भुमराळा आणि सावरगाव तेली परिसरात ४ सप्टेंबर रोजी मोटार वाहन विभागाने अचानक धडक मोहीम राबवली. या कारवाईत नियमांचे उल्लंघन करणाऱ्या ४ अवजड वाहनांवर कारवाई करून तब्बल १ लाख ३६ हजार रुपयांचा दंड वसूल करण्यात आला. ओव्हरलोड रेती वाहतुकीविरोधातील या कारवाईमुळे परिसरात खळबळ उडाली आहे.

किनगाव जट्टू, बीबी परिसरातील खापरखेड, भुमराळा आणि सावरगाव तेली या ठिकाणी शासनाच्यावतीने रेतीघाट देण्यात आले होते. मात्र, हे घाट गेल्या तीन महिन्यांपासून बंद असल्याचे सांगण्यात आले आहे. त्यानंतरही नियमापेक्षा जास्त रेतीसाठा उचलण्यासाठी संबंधित ठेकेदारांची धावपळ सुरू असल्याची माहिती समोर आली आहे.

या पार्श्वभूमीवर परिसरात सुरू असलेल्या नियमबाह्य आणि ओव्हरलोड रेती वाहतुकीला चाप लावण्यासाठी मोटार वाहन विभागाने अचानक तपासणी मोहीम राबवली. या मोहिमेत चार अवजड वाहनांवर कारवाई करण्यात आली. या कारवाईत एकूण १ लाख ३६ हजार रुपयांचा दंड वसूल करण्यात आला.

आरटीओच्या अचानक कारवाईमुळे परिसरातील रेती वाहतूकदार आणि ठेकेदारांमध्ये धावपळ उडाल्याचे दिसून आले. नियमबाह्य वाहतुकीविरोधात प्रशासनाने केलेल्या या कारवाईचे नागरिकांकडून स्वागत होत आहे.

रेती वाहतुकीदरम्यान काही वाहनांवर नंबर प्लेट नसल्याचे नागरिकांच्या निदर्शनास आले होते. प्रशासनाची नजर चुकवण्यासाठी अशा पद्धतीने वाहतूक केली जात असल्याचा आरोपही नागरिकांकडून करण्यात आला. या अवैध वाहतुकीसंदर्भात महसूल विभाग, पोलीस प्रशासन तसेच मोटार वाहन विभागाकडे अनेक लेखी व तोंडी तक्रारी करण्यात आल्या होत्या.

या तक्रारींच्या पार्श्वभूमीवर मोटार वाहन विभागाने परिसरात अचानक तपासणी मोहीम राबवली. नियमांचे उल्लंघन करणाऱ्या चार अवजड वाहनांवर दंडात्मक कारवाई करण्यात आली. या कारवाईनंतर परिसरातील रेती वाहतुकीवर प्रशासनाची नजर असल्याचे स्पष्ट झाले आहे.

ही धडक मोहीम मोटार वाहन निरीक्षक मंदार टवलारकर आणि सतीश टूले यांच्या मार्गदर्शनाखाली पार पडली. कारवाईदरम्यान वाहन चालक अशोक ढाकणे आणि योगेश इंगळे यांनी महत्त्वाची भूमिका बजावली.

नियमबाह्य वाहतुकीविरोधात पुढील काळातही अशा मोहिमा सुरू राहणार का, याकडे नागरिकांचे लक्ष लागले आहे.