अवघ्या २६ व्या वर्षी जीवनप्रवास थांबला; चिखलीतील तरुण तलाठी पियुष गायकवाड यांची आत्महत्या

चिखली, बुलढाणा : विशाल गवई

अवघ्या २६ व्या वर्षी एका तरुणाचा जीवनप्रवास संपल्याची घटना चिखली शहरातून समोर आली आहे. चिखली तहसील कार्यालयांतर्गत गोदरी बीटमध्ये तलाठी म्हणून कार्यरत असलेल्या पियुष पांडुरंग गायकवाड यांनी राहत्या घरी गळफास घेऊन आत्महत्या केल्याची माहिती समोर आली आहे. बुधवारी, १४ ऑक्टोबर रोजी घडलेल्या या घटनेमुळे महसूल विभागासह चिखली शहरात हळहळ व्यक्त होत आहे.

पियुष गायकवाड हे आईसोबत चिखलीतील सरस्वतीनगर परिसरात राहत होते. बुधवारी सकाळी आईच्या हातचे जेवण केल्यानंतर त्यांनी आराम करण्यासाठी खोलीत जात असल्याचे सांगितले. मात्र, बराच वेळ होऊनही खोलीचा दरवाजा उघडला नाही. त्यामुळे दुपारी सुमारे दोन वाजण्याच्या सुमारास हा प्रकार समोर आल्याची प्राथमिक माहिती आहे. घटनेची माहिती संबंधितांना देण्यात आली.

पियुष गायकवाड हे मूळचे दहिद बुद्रुक येथील रहिवासी होते. ते सध्या चिखलीतील सरस्वतीनगर परिसरात वास्तव्यास होते. महसूल विभागात तलाठी म्हणून जबाबदारी सांभाळत असतानाच ते काही काळ पुणे येथे एमपीएससी परीक्षेची तयारीही करत होते. काही दिवसांपूर्वीच ते पुण्याहून चिखली येथे घरी परतले होते, अशी प्राथमिक माहिती मिळाली आहे.

अल्पवयातच शासकीय सेवेत कार्यरत असलेल्या पियुष यांच्या अचानक जाण्याने त्यांच्या सहकाऱ्यांमध्ये आणि परिचितांमध्ये दुःख व्यक्त केले जात आहे. एका तरुणाच्या अशा आकस्मिक मृत्यूने परिसरात हळहळ व्यक्त होत असून, त्यांच्या कुटुंबीयांवर दुःखाचा डोंगर कोसळला आहे.

दरम्यान, पियुष गायकवाड यांनी आत्महत्येसारखे टोकाचे पाऊल नेमके कोणत्या कारणामुळे उचलले, हे अद्याप स्पष्ट झालेले नाही. या घटनेमागील कारणांबाबत कोणतीही अधिकृत माहिती समोर आलेली नसल्याने तर्कवितर्कांना वाव देणे योग्य ठरणार नाही. वृत्त लिहेपर्यंत चिखली पोलीस ठाण्यात या घटनेची अधिकृत नोंद झालेली नसल्याची माहिती मिळाली होती.

टीप : या घटनेबाबत पोलिसांकडून अधिकृत माहिती समोर आल्यास बातमीत आवश्यक ती दुरुस्ती व अद्ययावत माहिती समाविष्ट करावी.