खामगावात जिनिंगला भीषण आग; MIDC मधील भारत जिनिंग कारखान्यात मोठे नुकसान

दुपारच्या सुमारास जिनिंगच्या एका भागातून अचानक धुराचे लोट बाहेर येऊ लागले. काही क्षणांतच आगीने रौद्र रूप धारण करत जिनिंगमधील कापसाचा साठा, विद्युत यंत्रणा व यंत्रसामग्रीला वेढा दिला. आगीचे प्रचंड लोळ व दाट धुरामुळे संपूर्ण परिसरात भीतीचे वातावरण पसरले होते.

👉 विशेष जाहिरात | अधिक माहितीसाठी क्लिक करा

आग लागल्याचे लक्षात येताच कारखान्यातील कामगार व प्रत्यक्षदर्शी नागरिकांनी तत्काळ प्रसंगावधान राखत जिनिंगमध्ये उपलब्ध असलेल्या पाण्याच्या साहाय्याने आग आटोक्यात आणण्याचा प्रयत्न केला. त्याचवेळी अग्निशमन विभागाला माहिती देण्यात आली.

माहिती मिळताच अग्निशमन विभागाचे दोन बंब (MIDC) घटनास्थळी दाखल झाले. अग्निशमन कर्मचाऱ्यांनी सुमारे तासाभराच्या अथक प्रयत्नांनंतर आगीवर नियंत्रण मिळवले. या आगीत मोठ्या प्रमाणात कापूस, विद्युत वायरिंग तसेच काही यंत्रसामग्री जळून खाक झाल्याची प्राथमिक माहिती समोर आली आहे.

या घटनेमुळे खामगाव औद्योगिक परिसर MIDC पुन्हा एकदा सुरक्षेच्या दृष्टीने चर्चेत आला असून, जिनिंग व कारखान्यांमधील विद्युत सुरक्षेवर प्रश्नचिन्ह निर्माण झाले आहे. प्रशासनाकडून नुकसानीचा पंचनामा सुरू असून, आगीचे नेमके कारण तपासले जात आहे.