चिखली शहरातील श्रीकृष्णनगर परिसरात वृद्धाचे घर फोडून सोन्या-चांदीचे दागिने आणि रोख रक्कम असा तब्बल ७२ हजार रुपयांचा मुद्देमाल लंपास करणाऱ्या कुख्यात अट्टल चोराच्या मुसक्या अखेर पोलिसांनी आवळल्या आहेत. ‘मोक्का’अंतर्गत कारवाई झालेल्या आरोपीला चिखली पोलिसांच्या डी.बी. पथकाने अहिल्यानगर जिल्ह्यातील नेवासा तालुक्यातून ताब्यात घेतले. पोलिसांनी आरोपीकडून चोरीला गेलेला संपूर्ण मुद्देमाल हस्तगत केल्याने या घरफोडीच्या गुन्ह्याचा छडा लागला आहे.
श्रीकृष्णनगर येथील रहिवासी रघुनाथ जगन्नाथ कंगले (वय ६९) हे २९ जुलै रोजी छत्रपती संभाजीनगर येथे मुलाकडे गेले होते. २ ऑगस्ट रोजी ते घरी परतले असता घराच्या गेटचे आणि मुख्य दरवाजाचे कुलूप तुटलेले दिसले. घरात पाहणी केली असता कपाटातील सोन्याचे मंगळसूत्र, मणी, २५ चांदीची नाणी, चांदीचा शिक्का आणि रोख १२ हजार रुपये असा एकूण ७२ हजार रुपयांचा मुद्देमाल गायब असल्याचे त्यांच्या लक्षात आले.
या घटनेनंतर चिखली पोलीस ठाण्यात गुन्हा दाखल करण्यात आला. पोलिसांनी तपासाला वेग देत परिसरातील माहिती आणि उपलब्ध सुरागांच्या आधारे आरोपीचा शोध सुरू केला.
पोलीस निरीक्षक भूषण गावंडे यांच्या मार्गदर्शनाखाली डी.बी. पथकाने तपासाची चक्रे वेगाने फिरवली. तपासादरम्यान पोलिसांना मिळालेल्या गुप्त माहितीच्या आधारे घरफोडीतील संशयित आरोपी अहिल्यानगर जिल्ह्यातील नेवासा तालुक्यातील सलाबतपूर येथे असल्याचे समोर आले.
त्यानंतर पोलिसांच्या पथकाने सलाबतपूर येथे कारवाई करत डीचेन त्र्यंबक भोसले (वय ४८, रा. सलाबतपूर, ता. नेवासा, जि. अहिल्यानगर) याला ताब्यात घेतले.
पोलिसांच्या माहितीनुसार, भोसले हा कुख्यात अट्टल चोर असून त्याच्यावर यापूर्वी विविध जिल्ह्यांत घरफोडी आणि दरोड्यासारखे गंभीर गुन्हे दाखल आहेत. अहिल्यानगर जिल्ह्यात त्याच्यावर ‘मोक्का’अंतर्गत कारवाई झालेली आहे.
आरोपीला ताब्यात घेतल्यानंतर पोलिसांनी त्याची कसून चौकशी केली. चौकशीदरम्यान त्याने चिखलीतील घरफोडी केल्याची कबुली दिल्याचे पोलिसांनी सांगितले. त्यानंतर पोलिसांनी आरोपीकडून चोरीस गेलेला संपूर्ण मुद्देमाल हस्तगत केला.
या कारवाईमुळे श्रीकृष्णनगर परिसरातील घरफोडीच्या या गुन्ह्याचा तपास महत्त्वाच्या टप्प्यावर पोहोचला आहे. आरोपीच्या पूर्वीच्या गुन्हेगारी पार्श्वभूमीचीही पोलिसांकडून माहिती घेतली जात आहे.
