अंजनी खुर्दमध्ये ईद मिलादचा उत्साह; मदरशातील मुलांचा जुलूस अन् नात-कलिमाचे पठण

अंजनी खुर्द  : शेख बाबा शेख नुर

लोणार तालुक्यातील अंजनी खुर्द येथे ईद मिलाद उत्साहपूर्ण वातावरणात साजरा करण्यात आला. ईद मिलाद निमित्त मुस्लिम समाज बांधवांकडून विविध धार्मिक आणि सामाजिक कार्यक्रमांचे आयोजन करण्यात आले. यावेळी मदरशातील मुलांचा जुलूस, नात, कलिमा आणि हदीस पठणासह विविध कार्यक्रम पार पडले.

बुधवारी (दि. 26 ऑगस्ट) सकाळी 9 वाजता बंगला चौक येथून जुलूसला सुरुवात झाली. मदरशातील मुलांनी गावातून जुलूस काढत सहभाग नोंदवला. जुलूसदरम्यान गावात उत्साहाचे वातावरण पाहायला मिळाले.

या वेळी K.G.N ग्रुपच्या वतीने मदरशातील मुलांना विविध फळे आणि खाऊचे वाटप करण्यात आले. गावचे सरपंच अमोल अवसरमोल यांनी सर्व मुलांना गुलाब देऊन त्यांचे स्वागत केले.

यानंतर जामा मस्जिद मदरशातील मुलांचा जलसा आयोजित करण्यात आला. या कार्यक्रमात मुलांनी नात, कलिमा आणि हदीसचे पठण केले. उपस्थितांनी मुलांचा उत्साह वाढवला.

कार्यक्रमाच्या शेवटी इमाम हाफिज मुशरफ यांनी दुआ केली. दुआनंतर ईद मिलाद कार्यक्रमाची सांगता करण्यात आली.

कार्यक्रम यशस्वी करण्यासाठी K.G.N. ग्रुपच्या सर्व सदस्यांनी परिश्रम घेतले. यावेळी राजू अली, सत्तार भाई, अफसर भाई, हैदर भाई, हबीब भाई, रशीद भाई यांच्यासह समाज बांधव उपस्थित होते.