बोले तैसा चाले! ह.भ.प. प्रकाश महाराज जवंजाळ यांच्या मुलाचा साधेपणात पार पडलेला आदर्श विवाह चर्चेत

“बोले तैसा चाले, त्याची वंदावी पाऊले” या संतवचनाचा प्रत्यय देणारा हा विवाह ठरला. समाजात आदर्श जीवनपद्धतीचा पुरस्कार करणारे अनेक जण दिसतात; मात्र विचारांना कृतीची जोड देणे ही खरी कसोटी असते. जवंजाळ कुटुंबाने आपल्या आचरणातून याचे जिवंत उदाहरण समाजासमोर ठेवले.

महाराष्ट्र राज्य वारकरी महामंडळाचे अध्यक्ष तसेच श्री विठ्ठल रुक्मिणी मंदिर समिती पंढरपूरचे विश्वस्त ह.भ.प. प्रकाश महाराज जवंजाळ यांचे चिरंजीव अॅडव्होकेट विशाल जवंजाळ यांच्या विवाहाचा विचार सुरू झाल्यानंतर कुंभारझरी येथील स्व. चंद्रशेखर लोखंडे यांच्या कन्येचे स्थळ सुचविण्यात आले. ८ फेब्रुवारी रोजी वधू-वरांची भेट झाली, तर १२ फेब्रुवारी रोजी पाहुण्यांसमक्ष ओळख व पाहुणचार कार्यक्रम पार पडला.

कुंकू-टिळ्याच्या चर्चेनंतर वराला चिखली येथून बोलावण्यात आले आणि दुपारी विधी पार पडले. उपस्थित पाहुण्यांनी साधेपणात पार पडलेल्या या कार्यक्रमाचे विशेष कौतुक केले. विवाह सोहळा अत्यंत साध्या पद्धतीने पार पाडावा, असा आग्रह मान्यवरांनी व्यक्त केला.

राजर्षी छत्रपती शाहू महाराज मल्टीस्टेट बँकेचे संस्थापक संदीप दादा शेळके, नागेश्वर संस्थान मूर्तडचे महंत पु. गंजीधर बाबा, ग्रंथालय भारतीचे राष्ट्रीय सचिव सुनीलजी वायाळ तसेच वारकरी धर्मसंकीर्तन मंडळाचे ह.भ.प. सोनूने गुरुजी यांनी आदर्श विवाह संकल्पनेला समर्थन देत हा विचार अमलात आणण्याची प्रेरणा दिली. वधू-वर दोन्ही कुटुंबे वारकरी संप्रदायाची उपासक असल्याने हा निर्णय सर्वसंमतीने स्वीकारण्यात आला.

१२ फेब्रुवारी रोजी पाहुणकीसाठी गेलेली मंडळी वधूसह परतली आणि साधेपणात विवाह सोहळा संपन्न झाला. या प्रसंगी भोकरदन विधानसभा मतदारसंघाचे आमदार संतोष पाटील दानवे यांच्या मातोश्री निर्मलाताई दानवे उपस्थित होत्या.

यावेळी विविध क्षेत्रातील मान्यवर व समाजधुरीण उपस्थित होते. साधेपणा, संस्कार आणि समाजाभिमुख विचार यांचा संगम असलेला हा विवाह समाजासाठी प्रेरणादायी ठरत असून आडंबरमुक्त विवाहाची चळवळ मजबूत करण्यासाठी अशा उपक्रमांची गरज असल्याचे मत उपस्थितांनी व्यक्त केले.