नारायणराव आरु पाटील|वाशिम जिल्हा प्रतिनिधी
पोखरा योजनेतील भ्रष्टाचार प्रकरणामुळे संपूर्ण तालुक्यात खळबळ उडाली असून, पोखरा योजनेतील भ्रष्टाचार विरोधात आवाज उठवणाऱ्या पत्रकारावर दबाव आणण्याचा हा प्रयत्न असल्याचे बोलले जात आहे.रिसोड तालुक्यातील शेलुखडसे येथील पत्रकार वसंत खडसे हे एका वृत्तपत्रात उपसंपादक म्हणून कार्यरत आहेत. अन्याय, अत्याचार व भ्रष्टाचाराविरुद्ध सातत्याने लेखणी चालवणाऱ्या या पत्रकाराने नानाजी देशमुख कृषी संजीवनी प्रकल्प (पोखरा योजना) अंतर्गत झालेल्या कथित भ्रष्टाचारावर वृत्तमालिका प्रकाशित केली होती.
पोखरा योजनेतील गैरप्रकारांवर प्रशासनाची दखल
पत्रकार वसंत खडसे यांनी पुराव्यानिशी मुख्यमंत्री, प्रधान सचिव व वरिष्ठ अधिकाऱ्यांकडे तक्रार दाखल केली होती. या तक्रारीची गंभीर दखल घेत जिल्हाधिकारी यांनी तातडीने चौकशीचे आदेश दिले असून वरिष्ठ तपास अधिकाऱ्यांची नेमणूक करण्यात आली आहे.
दि. २६ डिसेंबर रोजी तपास अधिकारी संतोष वाळके यांच्या पथकाने शेलुखडसे येथे भेट देत संबंधित लाभार्थ्यांच्या शेतजमिनी, नेटशेड, फळबाग, वनीकरण व विहिरींची प्रत्यक्ष पाहणी केली.
धमकीचा प्रकार उघड
तपास अंगलट येत असल्याचे लक्षात येताच आरोपी संजय गजानन खडसे व त्यांची आई लक्ष्मी गजानन खडसे यांनी पत्रकार वसंत खडसे यांच्या पत्नी सौ. अनिता वसंत खडसे यांना शिवीगाळ करत जीवे मारण्याची धमकी दिल्याचा आरोप आहे.
या घटनेनंतर पत्रकार वसंत खडसे यांनी रिसोड पोलीस ठाण्यात अधिकृत तक्रार दाखल केली आहे. ठाणेदार रामेश्वर चव्हाण यांच्या मार्गदर्शनाखाली बीट जमादार श्री. रंजवे पुढील तपास करीत आहेत.
पत्रकारांच्या सुरक्षिततेचा प्रश्न ऐरणीवर
पोखरा योजनेतील भ्रष्टाचार उघड करणाऱ्या पत्रकाराला व त्याच्या कुटुंबाला धमकी दिल्याने पत्रकारांच्या सुरक्षेचा प्रश्न पुन्हा एकदा ऐरणीवर आला आहे. दोषींवर तातडीने कठोर कारवाई करण्याची मागणी होत आहे.
👉 हे पण वाचा..
- रिसोड येथे बँक ऑफ महाराष्ट्रतर्फे महिला बचत गट कर्जवाटप मेळावा; महिलांच्या स्वावलंबनाला बळ.
- बुलढाणा जिल्ह्यातील थरकाप उडवणारी घटना: पोटच्या चिमुरड्यांना मृत्यूच्या दारात ढकलून मातेने संपवली जीवनयात्रा.
- सिंदखेडराजात धक्कादायक प्रकार: ११ वर्षीय मुलीवर दोन अल्पवयीन मुलांचा अतिप्रसंगाचा प्रयत्न; तालुक्यात संताप.
📌 अधिक स्थानिक, विश्वासार्ह व सत्य बातम्यांसाठी Kattanews.in वाचत रहा.
