चिखलीत मुलींच्या छेडछाडीविरोधात उपनगराध्यक्षांचा पोलिसांना इशारा; “कारवाई करा, अन्यथा महिलांना घेऊन रस्त्यावर उतरू!”

चिखली : विशाल गवई 

चिखली शहरातील शाळा, महाविद्यालये आणि शिकवणी वर्गांच्या परिसरात विद्यार्थिनींची छेडछाड, टवाळखोरी आणि दादागिरीच्या तक्रारी समोर आल्याने विद्यार्थिनींच्या सुरक्षिततेचा प्रश्न ऐरणीवर आला आहे. या प्रकारांना तातडीने आळा घालून संबंधितांवर कठोर कारवाई करावी, अशी मागणी चिखली नगरपालिकेच्या उपनगराध्यक्ष सौ. वैशालीताई कपिल खेडेकर यांनी केली आहे. याबाबत त्यांनी चिखली पोलीस ठाण्यात जाऊन ठाणेदारांना निवेदन दिले.

शाळा सुरू होण्याच्या आणि सुटण्याच्या वेळेत काही युवक दुचाकींवरून शाळा परिसरात घोळका करून उभे राहत असल्याचे निवेदनात नमूद करण्यात आले आहे. विद्यार्थिनी बाहेर पडताच त्यांच्या मागे दुचाकीने फिरणे, अश्लील शेरेबाजी करणे आणि छेडछाड करण्याचे प्रकार होत असल्याच्या तक्रारी प्राप्त झाल्याचे खेडेकर यांनी सांगितले.

काही युवक विद्यार्थ्यांशी विनाकारण वाद घालून दादागिरी करीत असल्याचेही पोलिसांच्या निदर्शनास आणून देण्यात आले आहे. त्यामुळे शाळा, महाविद्यालये आणि शिकवणी वर्गांच्या परिसरात विद्यार्थिनींच्या सुरक्षिततेसाठी पोलिसांनी विशेष लक्ष देण्याची गरज असल्याचे निवेदनातून सांगण्यात आले.

विशेषतः सायंकाळी ५ ते ७ वाजण्याच्या सुमारास पारधी बाबा मंदिर परिसरातील शिकवणी वर्गांजवळ दुचाकींवरून फिरणाऱ्या टवाळखोर युवकांचा वावर वाढल्याचा आरोप करण्यात आला आहे. क्लासेस सुटण्याच्या वेळेत विद्यार्थिनींची मोठी वर्दळ असते. त्यामुळे या परिसरात पोलिसांची नियमित गस्त वाढवून संबंधितांवर कायदेशीर कारवाई करावी, अशी मागणी करण्यात आली आहे.

विद्यार्थिनींच्या सुरक्षिततेचा प्रश्न गांभीर्याने घेऊन पोलिसांनी तातडीने योग्य ती कारवाई करावी, अशी भूमिका सौ. वैशालीताई खेडेकर यांनी मांडली. कारवाई न झाल्यास महिलांना सोबत घेऊन रस्त्यावर उतरून या टवाळखोरांचा बंदोबस्त करू, असा सज्जड इशाराही त्यांनी दिला.

“मुलींच्या सुरक्षिततेशी कोणतीही तडजोड केली जाणार नाही,” अशी ठाम भूमिका त्यांनी यावेळी व्यक्त केली. या निवेदनामुळे चिखली शहरातील शाळा, कॉलेज आणि क्लासेस परिसरातील विद्यार्थिनींच्या सुरक्षेचा मुद्दा पुन्हा चर्चेत आला आहे.

निवेदन देतेवेळी कपिल खेडेकर तसेच पोलीस उपनिरीक्षक लोखंडे उपस्थित होते.