मेरा बुद्रुकच्या सुपुत्राची UPSC मध्ये झेप; शुभम डोंगरदिवे यांची सनदी अधिकारी म्हणून गुजरातमध्ये नियुक्ती

बुलढाणा जिल्ह्यातील चिखली तालुक्यातील मेरा बुद्रुक येथील सुपुत्र शुभम त्र्यंबकराव डोंगरदिवे यांनी अथक परिश्रम, जिद्द, चिकाटी आणि सातत्यपूर्ण अभ्यासाच्या जोरावर UPSC अर्थात संघ लोकसेवा आयोगाच्या परीक्षेत यश संपादन करून सनदी अधिकारी म्हणून आपल्या कारकिर्दीला सुरुवात केली आहे. नुकताच त्यांनी गुजरात राज्याची राजधानी गांधीनगर येथील गुमवन येथे सीनियर सुप्रिटेंडंट पोस्ट ऑफिस या पदाचा पदभार स्वीकारला.

शुभम डोंगरदिवे यांच्या या उल्लेखनीय यशामुळे मेरा बुद्रुक गावाच्या शिरपेचात आणखी एक मानाचा तुरा रोवला गेला आहे. ग्रामीण भागातून प्रतिकूल परिस्थितीवर मात करत त्यांनी मिळवलेले हे यश परिसरातील विद्यार्थी आणि युवकांसाठी प्रेरणादायी ठरत आहे.

शुभम यांचे प्राथमिक आणि माध्यमिक शिक्षण सामान्य परिस्थितीत झाले. पुढील शिक्षण घेत असताना त्यांनी आपले ध्येय निश्चित करून सातत्याने अभ्यास आणि कठोर परिश्रम केले. UPSC सारखी देशातील अत्यंत कठीण मानली जाणारी परीक्षा उत्तीर्ण करून सनदी अधिकारी होण्याचे त्यांचे स्वप्न अखेर साकार झाले.

प्रशिक्षण पूर्ण केल्यानंतर त्यांनी गुजरातमध्ये आपल्या प्रशासकीय सेवेला सुरुवात केली. गांधीनगर येथे पदभार स्वीकारल्यानंतर मेरा बुद्रुकसह चिखली तालुक्यातील ग्रामस्थ, मित्र, नातेवाईक आणि शुभेच्छुकांकडून त्यांच्यावर अभिनंदनाचा वर्षाव होत आहे.

शुभम डोंगरदिवे यांचे कुटुंबही सेवाभावी पार्श्वभूमीचे आहे. त्यांचे वडील महाराष्ट्र पोलीस दलात सेवा बजावून निवृत्त झाले आहेत. त्यांचा भाऊही महाराष्ट्र पोलीस दलात कार्यरत आहे. त्यांच्या दोन बहिणीही उच्च अधिकारी पदावर कार्यरत आहेत.

आपल्या यशाचे श्रेय शुभम डोंगरदिवे यांनी आई-वडील, भाऊ, बहिणी आणि शिक्षकांना दिले आहे. कुटुंबीयांचे प्रोत्साहन, शिक्षकांचे मार्गदर्शन आणि स्वतःची मेहनत यामुळेच हे यश मिळवता आल्याचे त्यांनी सांगितले.

प्रतिकूल परिस्थिती असली तरी ध्येय निश्चित करून सातत्याने प्रयत्न केल्यास यश मिळवता येते, हे शुभम डोंगरदिवे यांच्या प्रवासातून दिसून येते. त्यांच्या यशामुळे मेरा बुद्रुक गावाची मान उंचावली असून ग्रामीण भागातील विद्यार्थ्यांसाठी त्यांचा प्रवास निश्चितच आदर्श आणि प्रेरणादायी ठरणार आहे.

शुभम डोंगरदिवे यांनी देशपातळीवरील प्रशासकीय सेवेत प्रवेश करून आपल्या गावाचे नाव उज्ज्वल केले आहे. त्यांच्या या उज्ज्वल यशाबद्दल विविध स्तरातून अभिनंदन आणि कौतुक व्यक्त केले जात आहे.