सिंदखेडराजात प्रशासनाचा गोंधळ! प्रशिक्षणात शेकडो आशा सेविका उपाशी; एक सेविका बेशुद्ध पडून हात फ्रॅक्चर

जिजाऊ सृष्टी येथे पार पडलेल्या या कार्यक्रमाचा उद्देश आपत्तीच्या काळात तातडीने मदत करण्यासाठी आशा सेविकांना प्रशिक्षण देणे हा होता. मात्र, प्रत्यक्षात प्रशासनाच्या समन्वयाअभावी मोठा गोंधळ निर्माण झाला. भोजन व्यवस्थेचा पूर्णतः बोजवारा उडाल्याने अनेक महिलांना उपाशीच राहावे लागले.

या घटनेमुळे संतप्त झालेल्या आशा सेविकांनी तहसील कार्यालयात धाव घेत तीव्र नाराजी व्यक्त केली. काही काळ त्यांनी ठिय्या आंदोलन करत प्रशासनाविरोधात घोषणाबाजी केली.

या संदर्भात निवासी नायब तहसीलदार प्रांजल पवार यांनी सांगितले की, प्रशिक्षणासाठी मर्यादित संख्येतील सेविकांना बोलावण्यात आले होते. मात्र, पत्रातील ‘आपत्तीप्रवण गावांतील’ या शब्दाचा व्यापक अर्थ घेत मोठ्या संख्येने सेविका कार्यक्रमस्थळी आल्याने भोजन व्यवस्था अपुरी पडली.

दरम्यान, या घटनेची निष्पक्ष चौकशी करून संबंधित जबाबदार अधिकाऱ्यांवर कारवाई करावी, अशी मागणी सामाजिक कार्यकर्ते रामदास काहाळे यांनी जिल्हाधिकाऱ्यांकडे केली आहे. तसेच जखमी सेविकेला तातडीने वैद्यकीय उपचार व आर्थिक मदत देण्याची मागणीही करण्यात आली आहे.

या प्रकारामुळे आपत्ती व्यवस्थापनासारख्या गंभीर विषयावर आयोजित कार्यक्रमातही प्रशासनाच्या नियोजनातील त्रुटी पुन्हा एकदा समोर आल्या आहेत.