साखरखेर्डा |बुलढाणा जिल्हा|२२ फेब्रुवारी २०२६
चिखला काकड येथे छत्रपती शिवाजी महाराजांच्या पुतळा वादातून महिलांवर झालेल्या अमानुष मारहाण प्रकरणाच्या निषेधार्थ साखरखेर्डा शहरात आज कडकडीत बंद पाळण्यात आला. नागरिक, व्यापारी, युवक आणि शिवप्रेमींनी स्वयंस्फूर्तीने प्रतिसाद देत बाजारपेठ पूर्णतः बंद ठेवली. या घटनेमुळे संपूर्ण बुलढाणा जिल्ह्यात संतापाची लाट उसळली आहे.
बिबी पोलीस स्टेशन हद्दीतील चिखला काकड येथे काही दिवसांपूर्वी अज्ञात युवकांनी हिंदवी स्वराज्य संस्थापक छत्रपती शिवाजी महाराज यांच्या पुतळ्याची स्थापना केली होती. पुतळा हटवण्याच्या मुद्द्यावर ग्रामपंचायतीची बैठक बोलावण्यात आली होती. बैठकीदरम्यान उबाठा महिला उपजिल्हाप्रमुख संजीवनी वाघ यांनी पुतळा हटवण्यास तीव्र विरोध दर्शविला. त्या आणि इतर महिला पुतळ्यासमोर ठिय्या देऊन बसल्या होत्या.
दरम्यान, सरपंच काही युवक व महिलांसह घटनास्थळी आले. यावेळी संजीवनी वाघ व इतर महिलांना बेदम मारहाण करण्यात आली तसेच अंगावरील कपडे फाडण्याचा अमानुष प्रकार घडल्याचा आरोप करण्यात आला आहे. या घटनेची माहिती वाऱ्यासारखी जिल्हाभर पसरताच शिवप्रेमी युवक मोठ्या संख्येने चिखला काकड येथे दाखल झाले.
माजीमंत्री डॉ. राजेंद्र शिंगणे, माजी आमदार डॉ. शशिकांत खेडेकर, मेहकरचे आमदार सिद्धार्थ खरात, शिवसेना आमदार संजय गायकवाड, जिल्हाप्रमुख नरेंद्र खेडेकर, आमदार श्वेता महाले यांच्यासह अनेक नेते व हजारो शिवप्रेमींनी घटनास्थळी भेट दिली. मराठा आरक्षण संघर्ष समितीचे मनोज जरांगे यांच्या आगमनाने घोषणाबाजीने परिसर दणाणून गेला.
या घटनेच्या निषेधार्थ सामाजिक कार्यकर्ते संतोषराव मोरे यांच्या नेतृत्वाखाली साखरखेर्डा पोलीस स्टेशन येथे बंदचे निवेदन देण्यात आले होते. विविध सामाजिक संघटना, राजकीय पदाधिकारी आणि नागरिकांनी बंदला पाठिंबा दर्शविला.
आज सर्वपक्षीय आवाहनाला प्रतिसाद देत साखरखेर्डा शहर पूर्णपणे बंद राहिले. बसस्थानक परिसर, मुख्य बाजारपेठ आणि व्यापारी प्रतिष्ठाने दिवसभर बंद ठेवण्यात आली. नागरिकांनी शांततेत निषेध नोंदवत दोषींवर कठोर कारवाईची मागणी केली.
👉 संबंधित बातम्या
- मोताळा तालुक्यात खळबळ: बेपत्ता १७ वर्षीय मुलगी नदीपात्रात मृतावस्थेत आढळली
- शिवजयंती मिरवणुकीत गुंज येथे राजकीय राडा; चौघे जखमी, १९ आरोपींवर गुन्हे दाखल
- सुनगावात धक्कादायक घटना: 29 वर्षीय गणेश मिरटकर आत्महत्या; मानसिक छळामुळे टोकाचे पाऊल उचलल्याचा संशय
📢 ताज्या व विश्वासार्ह स्थानिक बातम्यांसाठी Kattanews.in ला भेट द्या.
