मेहकर | १३ फेब्रुवारी २०२६
मेहकर शहरातील वाटिका चौक परिसरात गस्तीदरम्यान शासकीय कर्तव्य बजावत असलेल्या पोलिस कर्मचाऱ्यावर हल्ल्याची धक्कादायक घटना बुधवारी (दि. ११) रात्री घडली. मेहकर पोलिस ठाण्यात तिघांविरुद्ध भारतीय न्याय संहिता (BNS) अंतर्गत गुन्हा दाखल करण्यात आला असून, या घटनेमुळे शहरात कायदा-सुव्यवस्थेबाबत चर्चा रंगली आहे.
पोलिस कॉन्स्टेबल शिवाजी श्रीराम चिमण (वय ३०) हे नियमित गस्त घालत असताना एमएच-२८-बीएच-६६६८ क्रमांकाच्या दुचाकीवर तिघेजण ट्रिपल सीट बसून आरडाओरड करत जात असल्याचे त्यांच्या निदर्शनास आले. वाहन थांबवून विचारणा केली असता आरोपी मुजाहीद मुकद्दर कुरेश (१८, रा. इमामवाडा, मेहकर) याने पोलिसांच्या गणवेशाची कॉलर पकडून धक्काबुक्की केल्याचा आरोप आहे.
यावेळी शेख बिलाल शेख अयाज (१८, रा. इमामवाडा) आणि रेहान वाजिद कुरेशी (१८, रा. माळीपेठ) यांनी शिवीगाळ करून गोंधळ घातल्याचे तक्रारीत नमूद आहे. साक्षीदारांनी मध्यस्थी करण्याचा प्रयत्न केला; मात्र आरोपींनी शासकीय कामात अडथळा निर्माण केल्याचे पोलिसांनी सांगितले.
फिर्यादीच्या तोंडी अहवाल व वैद्यकीय प्रमाणपत्राच्या आधारे प्रकरणात गुन्हा नोंदविण्यात आला असून पुढील तपास महिला पोलिस उपनिरीक्षक कांचन जारवाल करीत आहेत.
गस्तीदरम्यान पोलिस कर्मचाऱ्याशी झालेल्या धक्काबुक्कीच्या घटनेमुळे शहरात खळबळ उडाली असून, कायदा-सुव्यवस्थेच्या प्रश्नावर पुन्हा एकदा चर्चा सुरू झाली आहे.
📌 Related News
- चिखली-बुलढाणा रोडवर भीषण अपघात; परीक्षेला निघालेल्या युवकाचा मृत्यू
- रनिंगचा सराव करताना १९ वर्षीय युवकाचा अचानक मृत्यू; मेहकर तालुक्यातील सारशिव हादरले
- नापिकीचा घातक फटका! मेरा बु येथे शेतकरी दांपत्याचा विष प्राशन; पतीचा मृत्यू, पत्नी बचावली
📲 अधिक ताज्या आणि विश्वासार्ह बातम्यांसाठी Kattanews.in ला भेट द्या.
