SIR कामात हलगर्जीपणा खपवून घेतला जाणार नाही; सिंदखेडराजात जिल्हाधिकारी डॉ. प्रवीण देवरे यांचा कडक इशारा

बैठकीपूर्वी जिल्हाधिकारी डॉ. देवरे यांनी प्रत्यक्ष क्षेत्रीय कामाची पाहणी केली. संबंधित कर्मचारी आणि अधिकाऱ्यांशी संवाद साधत त्यांना येणाऱ्या अडचणी जाणून घेतल्या. कामातील तांत्रिक आणि प्रशासकीय अडथळ्यांवर तत्काळ उपाययोजना करण्याच्या सूचना त्यांनी दिल्या. कामाचा वेग वाढविताना अचूकतेशी कोणतीही तडजोड होऊ नये, यावर त्यांनी विशेष भर दिला.

यावेळी मार्गदर्शन करताना जिल्हाधिकारी म्हणाले की, निवडणूक प्रक्रिया आणि SIR हे लोकशाही व्यवस्थेतील अत्यंत संवेदनशील आणि महत्त्वाचे काम आहे. त्यामुळे प्रत्येक नोंद, प्रत्येक कागदपत्र आणि प्रत्येक पडताळणी अत्यंत जबाबदारीने पूर्ण करणे आवश्यक आहे. सर्व अधिकारी आणि कर्मचारी यांनी परस्पर समन्वय राखून विहित मुदतीत काम पूर्ण करावे. कोणतीही मानवी किंवा तांत्रिक चूक भविष्यात मोठ्या अडचणी निर्माण करू शकते, त्यामुळे कामात कोणतीही हलगर्जीपणा सहन केला जाणार नाही.

आढावा बैठकीदरम्यान जिल्हाधिकारी डॉ. प्रवीण कुमार देवरे यांनी प्रत्येक विभागाच्या कामाचा स्वतंत्रपणे आढावा घेत प्रलंबित कामे तातडीने पूर्ण करण्याच्या सूचना दिल्या. SIR प्रक्रियेत प्रत्येक माहिती अचूक आणि अद्ययावत असणे आवश्यक असून कोणत्याही प्रकारची त्रुटी भविष्यात निवडणूक प्रक्रियेवर परिणाम करू शकते, असे त्यांनी स्पष्ट केले. त्यामुळे सर्व संबंधित अधिकाऱ्यांनी वेळेचे काटेकोर नियोजन करून प्रत्येक टप्पा नियोजित मुदतीत पूर्ण करण्यावर भर द्यावा, असे निर्देश त्यांनी दिले.

बैठकीत डिजिटल नोंदींची अचूकता, कागदपत्रांची पडताळणी, क्षेत्रीय पातळीवरील कामाचा वेग आणि नागरिकांकडून प्राप्त होणाऱ्या अर्जांच्या निकाली प्रक्रियेबाबतही सविस्तर चर्चा करण्यात आली. प्रत्येक अधिकाऱ्याने स्वतःच्या जबाबदारीची जाणीव ठेवून काम करावे आणि कोणत्याही शंकेसंदर्भात वरिष्ठांशी तात्काळ समन्वय साधावा, असेही त्यांनी सांगितले.

जिल्हाधिकारी डॉ. देवरे यांनी प्रत्यक्ष पाहणीदरम्यान क्षेत्रीय कर्मचाऱ्यांशी संवाद साधत त्यांच्या अडचणी जाणून घेतल्या. आवश्यक त्या ठिकाणी प्रशासकीय पातळीवर तातडीने निर्णय घेऊन कामातील अडथळे दूर करण्याच्या सूचना त्यांनी संबंधित विभागांना दिल्या. नागरिकांना कोणताही मनस्ताप होणार नाही आणि प्रक्रिया पारदर्शक राहील याची प्रत्येक अधिकाऱ्याने विशेष काळजी घ्यावी, असेही त्यांनी नमूद केले.

यावेळी उपविभागीय अधिकारी प्रा. संजय खडसे, तहसीलदार अजित दिवटे, गट विकास अधिकारी अजित बांगर, नायब तहसीलदार डॉ. प्रवीण कुमार वराडे, सायली जाधव, मुंडे, निवडणूक नायब तहसीलदार संदीप बंगाळे, गट शिक्षणाधिकारी स्वप्नील निकम, भूमी अभिलेख विभागाचे उपअधीक्षक काशिनाथ भोईर, रचना जाधव तसेच नागेश खरात, प्रशांत वाघ, वृषाली घाणे, गणेश देशमुख, संजय सोनुने यांच्यासह महसूल, निवडणूक शाखा आणि विविध विभागांचे अधिकारी व कर्मचारी मोठ्या संख्येने उपस्थित होते.

बैठकीच्या शेवटी जिल्हाधिकारी डॉ. प्रवीण कुमार देवरे यांनी SIR प्रक्रियेत गुणवत्ता, पारदर्शकता आणि वेळेचे नियोजन या तीन बाबींना सर्वोच्च प्राधान्य देण्याच्या सूचना दिल्या. सर्व विभागांनी परस्पर समन्वय राखून काम केल्यास विहित मुदतीत प्रक्रिया पूर्ण होईल आणि आगामी निवडणुकांसाठी सक्षम यंत्रणा तयार राहील, असा विश्वास त्यांनी व्यक्त केला.