साखरखेर्डा |२८ मार्च २०२६
साखरखेर्डा येथे पेट्रोल आणि डिझेल टंचाईचे गंभीर चित्र समोर आले असून पेट्रोल पंपावर वाहनांच्या लांबच लांब रांगा लागल्या आहेत. डिझेल मिळत नसल्यामुळे शेकडो ट्रॅक्टर पंपावर उभे असून शेतीची कामे पूर्णपणे खोळंबली आहेत. शासनाकडून टंचाई नसल्याचा दावा केला जात असताना प्रत्यक्षात मात्र शेतकरी मोठ्या अडचणीत सापडले आहेत.
साखरखेर्डा येथे असलेल्या दोन्ही पेट्रोल पंपांवर गेल्या दोन दिवसांपासून पेट्रोल आणि डिझेल उपलब्ध नसल्याची स्थिती आहे. त्यामुळे शेतकरी ट्रॅक्टर घेऊन पंपावर थांबले असून डिझेल मिळवण्यासाठी तासन्तास प्रतीक्षा करावी लागत आहे.
पूर्वी शेतकरी कॅनमध्ये २० लिटर डिझेल घेऊन जात होते, मात्र आता कॅनमध्ये डिझेल देणे बंद झाल्याने ट्रॅक्टर थेट पेट्रोल पंपावर आणावे लागत आहे. यामुळे पंपांवर मोठ्या प्रमाणात गर्दी निर्माण झाली आहे.
दर आठवड्यातून एक ते दोन वेळाच टॅंकर उपलब्ध होत असल्याने आणि शासकीय सुट्ट्यांमुळे पुरवठा उशिरा होत असल्याने परिस्थिती अधिकच बिकट झाली आहे. याचा थेट परिणाम शेतीवर होत असून एप्रिल-मे महिन्यातील नांगरणी आणि रोटावेटरची कामे पूर्णपणे ठप्प झाली आहेत.
एकीकडे शासनाकडून डिझेलचा पुरवठा सुरळीत असल्याचा दावा केला जात आहे, तर दुसरीकडे साखरखेर्ड्यातील वास्तव वेगळेच चित्र दाखवत आहे. या संपूर्ण परिस्थितीत सर्वाधिक फटका शेतकऱ्यांना बसत असून शेतीची कामे अडचणीत आली आहेत.
