लोणार |२५ फेब्रुवारी २०२६
लोणार सरोवर, कमळजा माता मंदिर आणि वाढती पाण्याची पातळी हा सध्या बुलढाणा जिल्ह्यातील सर्वात चिंतेचा विषय बनला आहे. लोणार सरोवरातील वाढत्या पाण्यामुळे कमळजा माता मंदिर पाण्याच्या वेढ्यात सापडले असून धार्मिक वारसा आणि ऐतिहासिक बांधकाम धोक्यात आल्याची भीती व्यक्त होत आहे. गर्भगृहात पाणी साचल्याने मूर्ती संरचनेवर परिणाम होण्याची शक्यता भाविकांनी व्यक्त केली आहे.
प्रशासनाकडून ठोस उपाययोजना होत नसल्याच्या निषेधार्थ कमळजा माता सेवा संघ आणि भाविकांनी २३ फेब्रुवारी २०२६ रोजी तहसील कार्यालयासमोर लाक्षणिक साखळी उपोषण सुरू केले. मंदिराभोवती संरक्षण भिंत उभारण्याची मागणी दीर्घकाळ प्रलंबित असून पाणी थेट मंदिराच्या बांधकामाला धडकत असल्याचा आरोप करण्यात येत आहे.
भारतीय पुरातत्त्व विभागाचे अधीक्षक अरुण मलिक यांनी पाणी कमी करण्यासाठी उपाययोजना करण्याचे आश्वासन दिले होते. मात्र, कालावधी उलटूनही परिस्थितीत कोणताही बदल झालेला नसल्याचे भाविकांचे म्हणणे आहे. त्यामुळे ऐतिहासिक वारसा जतनाबाबत शासनाची भूमिका संशयास्पद असल्याची टीका वाढत आहे.
मंदिराच्या दैनंदिन पूजाअर्चेसाठी चावी विश्वस्त किंवा भक्त मंडळाकडे देण्याची मागणीही अद्याप प्रलंबित आहे. आंदोलनाच्या दुसऱ्या दिवशी समाधान आखाडे, देवांग संचेती, महेश नरवाडे आणि धिरज रायमूलकर यांनी सहभाग नोंदविला. यापूर्वी प्रशासनाला निवेदन देण्यात आले होते.
धार्मिक वारसा, श्रद्धा आणि ऐतिहासिक स्मारकांचे संरक्षण हा गंभीर विषय बनला असून तातडीने उपाययोजना न झाल्यास आंदोलन तीव्र करण्याचा इशारा भाविकांनी दिला आहे.
आपल्या भागातील समस्या, बातमी किंवा माहिती आम्हाला पाठवा.
संबंधित बातम्या
