साखरखेर्डा (वार्ताहर)|१५ मार्च २०२६ : सिंदखेडराजा तालुक्यातील लिंगा (साखरखेर्डा) गावात धरण पायथ्याशी पाणी असूनही ग्रामस्थांना पिण्याच्या पाण्यासाठी वनवण भटकंती करावी लागत असल्याचे धक्कादायक वास्तव समोर आले आहे. जलसंधारण योजनेतून मंजूर झालेल्या नळयोजनेचे काम चार वर्षांपासून सुरू असूनही अद्याप गावात नियमित पाणीपुरवठा सुरू झालेला नाही. त्यामुळे संतप्त ग्रामस्थांनी जिल्हाधिकारी कार्यालयासमोर बेमुदत उपोषणाचा इशारा दिला आहे.
पांग्रीकाटे – लिंगा ही गट ग्रामपंचायत असून लिंगा गावातील नागरिकांना पाणीपुरवठा करण्यासाठी जलसंधारण योजनेतून नळयोजना मंजूर करण्यात आली होती. मात्र या योजनेच्या कामात अनेक अनियमितता झाल्याचा आरोप ग्रामस्थांनी केला आहे. विहिरीचे बांधकाम उशिरा होणे, पाइपलाईन टाकताना झालेली चालढकल, वीजपुरवठ्याचा अभाव आणि पाइपलाईनमध्ये झालेल्या तांत्रिक अडचणी यामुळे पाणीपुरवठा सुरू होण्यास मोठा विलंब होत आहे.
लिंगा (साखरखेर्डा) गाव शेंदुर्जनपासून सुमारे चार किलोमीटर अंतरावर आहे. गावाच्या पायथ्याशी राजेगाव तलाव असून या तलावात मुबलक पाणीसाठा आहे. या तलावातून अनेक गावांची तहान भागवली जात असतानाही लिंगा गावातील नागरिक मात्र पाण्यासाठी त्रस्त असल्याचे चित्र आहे.
गावातील सुमारे ५० टक्के दलित कुटुंबांना पिण्याच्या पाण्यासाठी दूरवर जावे लागते. गावात खासगी टँकरद्वारे पाणी विकत घ्यावे लागत असून एका ड्रमसाठी सुमारे ७० रुपये मोजावे लागत आहेत. शेतमजुरी करून उदरनिर्वाह करणाऱ्या कुटुंबांना दररोज १०० ते २०० रुपये पाण्यासाठी खर्च करावे लागत असल्याने ग्रामस्थ आर्थिक अडचणीत सापडले आहेत.
दरम्यान, राज्यात ‘घरघर नळ’ योजनेची मोठ्या प्रमाणावर अंमलबजावणी होत असताना सिंदखेडराजा तालुक्यातील अनेक गावे अजूनही पाण्यासाठी तडफडत असल्याचे चित्र आहे. विविध नळयोजना मंजूर होऊनही प्रशासनाच्या अनास्थेमुळे काही योजना वांझोट्या ठरत असल्याचा आरोप स्थानिक नागरिकांनी केला आहे.
धरणात पाणी असूनही गावात पाणीपुरवठा होत नसल्याने याला जबाबदार कोण, असा सवाल ग्रामस्थांनी उपस्थित केला आहे. लिंगा गावात तात्काळ पाणीपुरवठा सुरू करण्यात यावा, अन्यथा जिल्हाधिकारी कार्यालयासमोर बेमुदत उपोषण करण्यात येईल, असा इशारा जनार्दन श्रीराम बोरकर, मधूकर भालेराव, गजानन भालेराव, रामचंद्र चेके, आनंदा भालेराव, संजय मानवतकर यांच्यासह अनेक ग्रामस्थांनी निवेदनाद्वारे दिला आहे.
Related News
- बुलढाणा : मोहाडी पाझर तलावात बिबट्याचा वावर; पाणी पिताना दिसताच ग्रामस्थांनी लाठ्या-काठ्यांनी हाकलला प्रशासनाकडे धाव
- बुलढाण्यात धक्कादायक सायबर गुन्हा! मोबाईल हॅक करून महिलेला Video Call वर विवस्त्र केलं; शारीरिक संबंधांची मागणी
- एसटीमध्ये मेगा भरती! १७,७४२ चालक-वाहक पदांसाठी मोठी संधी; परिवहन मंत्र्यांची मोठी घोषणा
👉 आपल्या भागातील ताज्या बातम्या, सरकारी योजना आणि नोकरी अपडेट्स मिळवण्यासाठी Kattanews.in नियमित वाचा.
