जालना | २८ जानेवारी २०२६
प्रजासत्ताक दिनाच्या दिवशीच लोकशाहीचा चौथा स्तंभ असलेल्या पत्रकारांवर पोलीसांकडून धक्का-बुक्की झाल्याचा धक्कादायक प्रकार जालना येथे समोर आला आहे. जालना जिल्ह्याच्या पालकमंत्री पंकजा मुंडे या २६ जानेवारी रोजी ध्वजारोहणासाठी जालना येथे उपस्थित होत्या.
ध्वजारोहण कार्यक्रमादरम्यान काही टीव्ही व डिजिटल माध्यमांचे पत्रकार व्हिडिओ चित्रीकरण करत असताना पोलीसांकडून त्यांना अडवण्यात आले. यावेळी पोलिसांनी थेट धक्का-बुक्की केल्याचा आरोप पत्रकारांनी केला आहे. हा प्रकार प्रजासत्ताक दिनासारख्या राष्ट्रीय सणाच्या दिवशी घडल्याने माध्यम क्षेत्रातून तीव्र संताप व्यक्त होत आहे.
👉 विशेष जाहिरात | अधिक माहितीसाठी क्लिक करा
ध्वजारोहणानंतर पालकमंत्री पंकजा मुंडे यांच्या वतीने पत्रकार परिषदेचे आयोजन करण्यात आले होते. मात्र, पत्रकारांवर झालेल्या कथित गैरवर्तनाच्या निषेधार्थ उपस्थित पत्रकारांनी जोरदार घोषणाबाजी करत या पत्रकार परिषदेला बहिष्कार टाकला.
“पत्रकारांवर झालेल्या अन्यायाला जाहीरपणे माफी मागितल्याशिवाय आम्ही कोणतीही पत्रकार परिषद कव्हर करणार नाही,” अशी ठाम भूमिका पत्रकारांनी घेतली. परिणामी पत्रकारांचा रोष पाहता पालकमंत्री पंकजा मुंडे यांनी पत्रकार परिषद न घेता काढता पाय घेतला.
या घटनेमुळे जिल्हा प्रशासन आणि पोलीस यंत्रणेच्या भूमिकेवर प्रश्नचिन्ह उपस्थित झाले असून, पत्रकार संरक्षण कायद्याची अंमलबजावणी करण्याची मागणी जोर धरू लागली आहे.
पत्रकारांवर झालेल्या या प्रकारावर तुम्ही काय म्हणता? खाली कमेंट करून प्रतिक्रिया द्या आणि ही बातमी शेअर करा.
