चिखलीत वन विभाग ‘ॲक्शन मोड’मध्ये; मेरा बुद्रुकमध्ये लाखोंचा अवैध लाकूड साठा जप्त

चिखली |सुनिल अंभोरे 

बुलढाणा जिल्ह्यातील चिखली तालुक्यात वन विभागाने मोठी धडक कारवाई करत मेरा बुद्रुक परिसरातून तब्बल दोन लाख रुपये किमतीचा अवैध लाकूड साठा जप्त केला आहे. या कारवाईमुळे अवैध वृक्षतोड करणाऱ्यांमध्ये खळबळ उडाली असून, वन विभाग आता पूर्णपणे ‘ॲक्शन मोड’मध्ये आल्याचे चित्र दिसत आहे.

मिळालेल्या माहितीनुसार, दिनांक २८ मे २०२६ रोजी वन विभागाला मेरा बुद्रुक शिवारात विनापरवाना निम आणि इतर अडजात प्रजातींच्या लाकडाचा मोठा साठा लपवून ठेवण्यात आल्याची गोपनीय माहिती मिळाली होती. माहितीची खात्री करून वन विभागाच्या पथकाने परिसरात अचानक छापा टाकला.

👉 विशेष जाहिरात | अधिक माहितीसाठी क्लिक करा

उपवनसंरक्षक बुलढाणा श्री. जमीर शेख यांच्या मार्गदर्शनाखाली पार पडलेल्या या कारवाईत सुमारे दोन लाख रुपये बाजारमूल्य असलेला लाकूड साठा जप्त करण्यात आला. अंचरवाडी बिटचे वनरक्षक गजानन माणिकराव पोटे यांनी घटनास्थळी जाऊन संपूर्ण कारवाई केली.

छाप्यादरम्यान कोणत्याही प्रकारचा वैध परवाना नसताना साठवून ठेवलेले मौल्यवान लाकूड वन विभागाच्या ताब्यात घेण्यात आले. या प्रकरणातील मुख्य सूत्रधारांचा शोध सुरू असून, तपास अधिक वेगाने करण्यात येत असल्याची माहिती वन विभागाकडून देण्यात आली आहे.

गेल्या काही दिवसांपासून मेरा बुद्रुक परिसरात होत असलेल्या वृक्षतोडीमुळे पर्यावरणप्रेमी आणि नागरिकांमध्ये तीव्र नाराजी व्यक्त होत होती. पर्यावरणाचा समतोल बिघडत असल्याच्या तक्रारी वाढल्यानंतर वन विभागाने या प्रकरणाची गंभीर दखल घेत तपासाची चक्रे गतिमान केली होती.

या कारवाईत वनरक्षक गजानन माणिकराव पोटे, वनसेवक ऋषिकेश तुपकर यांनी सहभाग घेतला. तसेच सहाय्यक वनसंरक्षक प्रादेशिक व कॅम्पा बुलढाणा श्री. वैभव काकडे आणि वनपरिक्षेत्र अधिकारी सुनील वाकोडे यांचे मार्गदर्शन लाभले. या प्रकरणाचा तपास वनपाल प्रदीप प्रकाश मुंढे हे करत आहेत.

“पर्यावरणाचा ऱ्हास करणारी आणि विनापरवाना वृक्षतोड करणारी कोणतीही टोळी असो, त्यांची गय केली जाणार नाही. मेरा बुद्रुक येथील कारवाई ही केवळ सुरुवात असून, मुख्य आरोपींपर्यंत वन विभाग लवकरच पोहोचेल,” असा इशारा उपवनसंरक्षक श्री. जमीर शेख यांनी दिला.

हे पण वाचा..

• घरासमोर लिंबू टाकून जादूटोणा? CCTV मुळे उघड झाला धक्कादायक प्रकार; चिखलीत आरोपीवर गुन्हा
• भरधाव रेती टिप्परची दुचाकीला भीषण धडक; उदनापूरच्या शेतकऱ्याचा जागीच मृत्यू, अंजनीखुर्द हादरले
• रेती माफियांचा पत्रकार रामदास कहाळे यांच्यावर जीवघेणा हल्ला; साखरखेर्ड्यात निषेध, आरोपींना अटक करण्याची मागणी

हे आवश्यक करा…

आपल्या परिसरातील ताज्या बातम्या, ब्रेकिंग न्यूज आणि विशेष अपडेट्ससाठी Kattanews.in ला नियमित भेट द्या. आपल्या भागातील बातमी किंवा माहिती आमच्यापर्यंत पोहोचवण्यासाठी आमच्याशी संपर्क साधा.