‘मी सिमेंट रोड बोलतोय…’; चिखलीत भाजप नगरसेवकाची अनोखी बॅनरबाजी, रस्त्याच्या निधीच्या मागणीने राजकीय चर्चांना उधाण

चिखली | विशाल गवई 

शहरातील न.प. हायस्कूलसमोरील सिमेंट रस्त्याच्या दुरवस्थेचा प्रश्न आता पुन्हा चर्चेत आला आहे. या रस्त्याच्या नूतनीकरणासाठी निधी उपलब्ध करून देण्याची मागणी करत चिखलीतील भाजप नगरसेवकाने अनोख्या पद्धतीने बॅनर लावले आहेत. ‘मी सिमेंट रोड बोलतोय…’ या आशयाच्या बॅनरमधून रस्त्याची अवस्था आणि त्याच्या नूतनीकरणाची गरज मांडण्यात आली आहे.

शहरातील विविध ठिकाणी लावण्यात आलेल्या या बॅनरमुळे नागरिकांचे लक्ष वेधले गेले आहे. रस्त्याच्या प्रश्नासाठी थेट सार्वजनिक ठिकाणी अशा स्वरूपात मागणी करण्यात आल्याने या विषयाची चर्चा आता राजकीय वर्तुळातही सुरू झाली आहे.

या बॅनरवर माजी नगरसेवक रामदास देव्हडे, विद्यमान नगरसेविका विमल देव्हडे आणि माजी नगरसेवक गोविंद देव्हडे यांची नावे व छायाचित्रे ‘शब्द संकलनकर्ते’ म्हणून देण्यात आली आहेत. त्यामुळे या बॅनरमागील राजकीय संदेशाबाबतही शहरात वेगवेगळ्या चर्चा सुरू झाल्या आहेत.

न.प. हायस्कूलसमोरील सिमेंट रस्त्याच्या दुरवस्थेकडे लक्ष वेधण्यासाठी बॅनरवर रस्त्याचे आत्मकथन मांडण्यात आले आहे. वर्षानुवर्षे चिखलीकरांची सेवा करणाऱ्या या रस्त्याला आता केवळ तात्पुरती डागडुजी नको, तर कायमस्वरूपी नूतनीकरणाची गरज असल्याचा संदेश या माध्यमातून देण्यात आला आहे.

आमदार श्वेता महाले यांनी इंग्रजकालीन बैलजोडी चौकातील पुलाच्या पुनरुज्जीवनासाठी केलेल्या कामाचा संदर्भ देत, त्याचप्रमाणे न.प. हायस्कूलसमोरील रस्त्यासाठीही निधी उपलब्ध करून द्यावा आणि कामाला मंजुरी मिळवून द्यावी, अशी मागणी बॅनरमधून करण्यात आली आहे.

विकासकामांसाठी निधीची मागणी करण्याचे अनेक अधिकृत मार्ग उपलब्ध असताना सार्वजनिक ठिकाणी बॅनर लावून हा प्रश्न मांडण्यात आल्याने त्यावर राजकीय चर्चांना सुरुवात झाली आहे. या कृतीमागे केवळ रस्त्याच्या कामाकडे लक्ष वेधण्याचा उद्देश आहे की स्थानिक पातळीवरील काही वेगळा संदेश आहे, याबाबत तर्क-वितर्क सुरू आहेत.

निधीवाटप आणि स्थानिक विकासकामांच्या प्राधान्यक्रमाबाबत काही नाराजी आहे का, अशी चर्चा राजकीय वर्तुळात होत असली तरी या चर्चांना संबंधितांकडून अधिकृत दुजोरा मिळालेला नाही. त्यामुळे बॅनरमधून मांडण्यात आलेली मागणी आणि त्यामागील अधिकृत भूमिका याकडे वेगळ्या पद्धतीने पाहणे महत्त्वाचे ठरणार आहे.

चिखली नगरपालिकेतील सत्ताधारी गट भाजपचा असल्याने या बॅनरची राजकीय चर्चा अधिक रंगली आहे. नगरपालिकेपासून विधानसभा आणि राज्य-केंद्र पातळीवरील भाजपच्या सत्तेच्या पार्श्वभूमीवर स्थानिक रस्त्याच्या कामासाठी नगरसेवकाने सार्वजनिक पद्धतीने निधीची मागणी केल्याने नागरिकांकडूनही प्रश्न उपस्थित केले जात आहेत.

शहरातील रस्ते, वाहतूक आणि नागरिकांच्या दैनंदिन अडचणींच्या पार्श्वभूमीवर न.प. हायस्कूलसमोरील रस्त्याचा प्रश्न प्रत्यक्षात कधी मार्गी लागतो, याकडे आता नागरिकांचे लक्ष लागले आहे.

दरम्यान, या बॅनरबाजीवर आमदार श्वेता महाले, स्थानिक भाजप पदाधिकारी आणि संबंधित नगरसेवक यांची अधिकृत भूमिका काय असणार, हे पाहणे महत्त्वाचे ठरणार आहे. सध्या मात्र ‘मी सिमेंट रोड बोलतोय…’ या अनोख्या बॅनरने चिखलीतील रस्त्याच्या प्रश्नाला पुन्हा एकदा चर्चेच्या केंद्रस्थानी आणले आहे.