२९ एप्रिलपर्यंत निर्णय घ्या, नाहीतर तीव्र आंदोलन! बुलढाण्यात शेतकऱ्यांचा सरकारला अल्टिमेटम

बुलढाणा |१९ एप्रिल २०२६

पिक विमा आणि शेतकरी आंदोलन या प्रश्नांवर बुलढाणा जिल्ह्यातील शेतकरी संतप्त झाले असून, खरीप 2025 हंगामातील अतिवृष्टी नुकसान होऊनही अद्याप विमा मिळाला नसल्याने शेतकऱ्यांनी सरकारला थेट अल्टिमेटम दिला आहे. २९ एप्रिल 2026 पर्यंत निर्णय न घेतल्यास तीव्र आंदोलन छेडण्याचा इशारा शेतकरी योद्धा कृती समितीने दिला आहे.

शासनाने नुकसान मान्य करून काही प्रमाणात मदत दिली असली तरी त्याच नुकसानाचा पिक विमा मंजूर न केल्याने शेतकरी अडचणीत सापडले आहेत. सुरुवातीला प्रशासनाने नुकसान मान्य करण्यास टाळाटाळ केली होती, मात्र शेतकऱ्यांनी प्रत्यक्ष परिस्थिती दाखवल्यानंतरच पाहणी करण्यात आली.

👉 विशेष जाहिरात | अधिक माहितीसाठी क्लिक करा

दरम्यान, बागायती शेतकऱ्यांवर अन्याय होत असल्याचा गंभीर आरोप करण्यात आला आहे. खरेदी-विक्री वेळी बागायती निकष लावले जातात, पण मदत देताना तेच निकष लागू केले जात नसल्याने अनेक पात्र शेतकरी वंचित राहत आहेत. त्यामुळे शेतकऱ्यांमध्ये संतापाची भावना अधिक तीव्र होत आहे.

या प्रश्नासाठी यापूर्वीही आंदोलन करण्यात आले होते. शेतकरी नेते बालाजी सोसे यांनी तब्बल ६० फूट उंच पाण्याच्या टाकीवर जाऊन आमरण उपोषण केले होते. त्यावेळी प्रशासनाकडून आश्वासन देण्यात आले होते, मात्र अद्याप त्याची पूर्तता झालेली नसल्याचा आरोप करण्यात आला आहे.

शेतकरी योद्धा कृती समितीने सरकारकडे खरीप 2025 साठी सरसकट पिक विमा तातडीने मंजूर करून वितरित करण्याची मागणी केली आहे. तसेच बागायती निकषांनुसार पात्र शेतकऱ्यांना मदत देण्यात यावी, अन्यथा ते निकष रद्द करावेत, अशीही मागणी करण्यात आली आहे.

१ मे हा महाराष्ट्र दिन आणि कामगार दिन असल्याने संघर्ष टाळून चर्चेतून मार्ग काढण्याची भूमिका समितीने घेतली आहे. मात्र, २९ एप्रिलपूर्वी मुख्यमंत्री आणि कृषिमंत्र्यांसोबत बैठक घेण्याची मागणी करण्यात आली आहे.

“२९ एप्रिलपर्यंत सर्व मागण्या मान्य करा, अन्यथा आम्हाला आंदोलनाचा मार्ग स्वीकारावा लागेल,” असा ठाम इशारा शेतकरी नेत्यांनी दिला आहे. त्यानंतर निर्माण होणाऱ्या परिस्थितीची जबाबदारी प्रशासनाची राहील, असेही स्पष्ट करण्यात आले.

जर ठोस निर्णय झाला नाही, तर सिंदखेडराजा तहसील कार्यालयासमोर आमरण उपोषण सुरू करण्यात येईल, असा इशारा देण्यात आला आहे. तसेच १ मे हा दिवस ‘काळा दिवस’ म्हणून पाळण्याचे आवाहन करत प्रत्येक शेतकऱ्याने घरावर काळी गुढी उभारावी, असेही सांगण्यात आले आहे.