भास्करराव शिंगणे विद्यालयात विद्यार्थिनींना सायकल वाटप; शिक्षणाला मिळाले नवे बळ

वरोडी | समाधान वानखेडे

शिक्षणाचा प्रवास अधिक सुलभ व्हावा आणि विद्यार्थिनींना शाळेत ये-जा करताना कोणतीही अडचण येऊ नये, या उद्देशाने गुंज येथील कै. भास्करराव रावजी शिंगणे विद्यालयात विद्यार्थिनींना सायकलींचे वाटप करण्यात आले. या उपक्रमामुळे विद्यार्थिनींच्या चेहऱ्यावर आनंद झळकला असून शिक्षणाच्या वाटचालीला नवे बळ मिळाल्याची भावना उपस्थितांनी व्यक्त केली.

सन २०२६-२७ या शैक्षणिक वर्षात आयोजित करण्यात आलेल्या या कार्यक्रमात शाळेच्या मुख्याध्यापिका मापारी मॅडम, शाळेचे संचालक अरुणभाऊ तुपकर तसेच शाळेतील शिक्षक व शिक्षकेतर कर्मचारी उपस्थित होते. मान्यवरांच्या हस्ते विद्यार्थिनींना सायकलींचे वितरण करण्यात आले.

यावेळी उपस्थितांनी मुलींच्या शिक्षणाला प्रोत्साहन देणारे उपक्रम समाजासाठी प्रेरणादायी असल्याचे सांगितले. ग्रामीण भागातील अनेक विद्यार्थिनींसाठी सायकल हे केवळ वाहतुकीचे साधन नसून शिक्षणाच्या स्वप्नांना गती देणारे महत्त्वाचे माध्यम आहे, असेही मत व्यक्त करण्यात आले.

सायकल मिळाल्यानंतर विद्यार्थिनींनी आनंद व्यक्त करत शाळा आणि संस्थेचे आभार मानले. या उपक्रमामुळे शाळेत नियमित उपस्थिती वाढण्यास आणि विद्यार्थिनींमध्ये शिक्षणाविषयी अधिक आत्मविश्वास निर्माण होण्यास मदत होईल, अशी अपेक्षा शिक्षकांनी व्यक्त केली.