अखेर कारवाई! शिंदी येथील तत्कालीन ग्रामसेवक दिनकर काळे निलंबित — महिलांशी गैरवर्तन व धमकी प्रकरण

सिंदखेडराजा पंचायत समिती अंतर्गत शिंदी येथील तत्कालीन ग्रामसेवक दिनकर काळे याला १ जानेवारी रोजी गटविकास अधिकारी सिंदखेडराजा वर्ग-१ अजितकुमार बांगर यांनी निलंबित केले. यासंदर्भात ग्रामपंचायत सदस्य गणेश तुकाराम खरात यांनी ४ डिसेंबर २०२४ रोजी जिल्हा परिषद मुख्य कार्यकारी अधिकारी यांच्याकडे लेखी तक्रार दाखल केली होती.

तक्रारीनुसार, ग्रामसेवक दिनकर काळे यांनी शिंदी येथे कार्यरत असताना महिलांशी अपमानास्पद वागणूक, गैरवर्तणूक तसेच मनमानी कारभार करून शासकीय कामकाजात अनियमितता केल्याचा आरोप आहे. याशिवाय ग्रामपंचायतमध्ये आलेल्या महिलांना धमकी देण्याचे प्रकारही समोर आले होते.

या प्रकरणात एका महिलेने व्हॉट्सॲप चॅटिंगच्या कारणावरून संबंधित ग्रामसेवकाला जाब विचारल्याची घटना चर्चेत आली होती. त्यानंतरही त्याच्या वर्तणुकीत सुधारणा न झाल्याने सरपंचांनी २७ ऑक्टोबर २०२५ रोजी गटविकास अधिकारी व १२ नोव्हेंबर २०२५ रोजी जिल्हा परिषद बुलढाणा यांच्याकडे लेखी तक्रार केली होती.

तक्रारींची गंभीर दखल घेत सदर ग्रामसेवकाची तातडीने तांदूळवाडी येथे बदली करण्यात आली होती. मात्र, फोनद्वारे तसेच गावात येऊन “तक्रार केली तर पाहून घेईल” अशी धमकी देत असल्याचा आरोप ग्रामपंचायत पदाधिकाऱ्यांनी केला.

या सर्व बाबींच्या अनुषंगाने जिल्हा परिषद सेवा शिस्त व अपील नियम १९६४ अंतर्गत तसेच विस्तार अधिकारी पंचायत सिंदखेडराजा यांच्या चौकशी अहवालानुसार दिनकर काळे यांना ग्रामपंचायत अधिकारी पदावरून निलंबित करण्यात आले आहे. 

हे पण वाचा..

“बाई मेली तरी मला फरक पडत नाही!” — सिंदखेडराजा तालुक्यातील वडाळी ग्रामपंचायत भ्रष्टाचारावर महिलाचे आमरण उपोषण; झेडपी CEO चा कथित संतापजनक उद्गार

निलंबन काळात संबंधित ग्रामसेवकाला कोणताही व्यवसाय अथवा नोकरी करता येणार नाही. मुख्यालयाबाबतचे स्वतंत्र आदेश जिल्हा परिषद बुलढाणा स्तरावरून निर्गमित होणार असल्याचे आदेशात नमूद आहे.