प्रतिभा/जगदने
उटी बुद्रुक येथे घडलेली पत्नीची हत्या ही घटना सर्वांना हादरवणारी ठरली आहे. पतीने मध्यरात्री झोपेत असलेल्या पत्नीवर कुऱ्हाडीने वार करून पत्नीची हत्या केल्याचे समोर आले आहे. कौटुंबिक वाद आणि अपमानाच्या रागातून घडलेल्या या प्रकरणामुळे गावात शोककळा पसरली असून सात महिन्यांच्या बाळासमोर ही भीषण पत्नीची हत्या झाल्याने समाजमन हेलावून गेले आहे.
जळगाव जामोद तालुक्यातील उटी बुद्रुक गावात ७ डिसेंबरच्या मध्यरात्री ही निघृण घटना घडली. मृतक लक्ष्मी पवन धुंदाळे (२४) झोपेत असताना तिचा पती पवन गजानन धुंदाळे (२८) याने कुऱ्हाडीचे वार करून तिचा जागीच मृत्यू केला. ‘तू काही कामाचा नाहीस, बाहेर जा आणि मरून जा’ असे पत्नीने सांगितल्यामुळे राग अनावर झाल्याचे पोलिस तपासात निष्पन्न झाले.
कृत्य झाल्यानंतर आरोपीचे आई-वडील घाबरून थेट ग्राम पोलिस पाटील संदीप गटमने यांच्या घरी गेले आणि संपूर्ण घटना सांगितली. पोलिस पाटलांनी तत्काळ घटनास्थळी धाव घेतली आणि नंतर जळगाव जामोद पोलिसांना माहिती दिली. पोलिसांनी पंचनामा करून मृतदेह शवविच्छेदनासाठी पाठवून पुढील तपास सुरू केला.लक्ष्मी आणि पवन हे शेतमजूर कुटुंबाचा उदरनिर्वाह करणारे दाम्पत्य होते. त्यांना सात महिन्यांची मुलगी आहे. आईची हत्या आणि वडील पोलिस कोठडीत—या परिस्थितीमुळे त्या चिमुकलीचे भविष्य अंधारात गेले आहे. गावात या घटनेने हळहळ व्यक्त केली जात आहे.८ डिसेंबर रोजी आरोपीला न्यायालयात हजर करण्यात आले असता न्यायालयाने त्याला १० डिसेंबरपर्यंत पोलिस कोठडी सुनावली. तपास पोलिस निरीक्षक नितीन कुमार पाटील यांच्या मार्गदर्शनाखाली उपनिरीक्षक स्नेहा शेडगे करत आहेत.
