सुलतानपुरात वाहतूक कोंडीत संधी साधली! मंडळ अधिकाऱ्याच्या कारमधून ५० हजारांची रोकड, शासकीय लॅपटॉप चोरीला

सुलतानपूर | विनायक कुटे 

सुलतानपूर बसस्थानक परिसरात वाहतूक कोंडीत अडकलेल्या मंडळ अधिकाऱ्याच्या चारचाकी वाहनातून अज्ञात चोरट्याने बॅग लंपास केल्याची घटना बुधवारी सकाळी घडली. या बॅगेत ५० हजार रुपयांची रोकड, शासकीय लॅपटॉप आणि कार्यालयीन कागदपत्रे होती. या घटनेमुळे परिसरात खळबळ उडाली आहे.

मिळालेल्या माहितीनुसार, मंडळ अधिकारी लक्ष्मण नारायण सानप हे मेहकर येथून लोणारकडे सेवानिवृत्तीच्या कार्यक्रमासाठी जात होते. बुधवारी सकाळी सुमारे अकरा वाजण्याच्या सुमारास त्यांचे चारचाकी वाहन सुलतानपूर बसस्थानक परिसरात वाहतूक कोंडीत अडकले होते.

याच गर्दीचा फायदा घेत अज्ञात चोरट्याने त्यांच्या वाहनातील बॅग चोरून नेली. काही वेळाने बॅग चोरीला गेल्याचे लक्षात आल्यानंतर त्यातील साहित्य आणि रोकड चोरीला गेल्याचे समोर आले. बॅगेत ५० हजार रुपये रोख, शासकीय कामकाजासाठी वापरण्यात येणारा लॅपटॉप तसेच कार्यालयीन कागदपत्रे होती.

सुलतानपूर बसस्थानक परिसरासारख्या वर्दळीच्या ठिकाणी घडलेल्या या घटनेमुळे वाहनधारकांच्या सुरक्षिततेचा प्रश्न पुन्हा ऐरणीवर आला आहे. प्रवासादरम्यान वाहनात रोकड, लॅपटॉप किंवा महत्त्वाची कागदपत्रे असलेली बॅग ठेवताना नागरिकांनी विशेष काळजी घेण्याची गरज आहे.

या प्रकरणाचा पुढील तपास पोलिसांकडून सुरू आहे. चोरीला गेलेली बॅग आणि त्यातील साहित्य शोधण्याचे आव्हान पोलिसांसमोर आहे.

अशाच स्थानिक आणि ताज्या बातम्यांसाठी KattaNews.in ला भेट देत राहा.

📲 Join KattaNews WhatsApp Group ✅