देऊळगाव राजात काळीज पिळवटून टाकणारी घटना! पडक्या घरात अर्भकाचा मृतदेह; मृत्यूचे गूढ उकलण्याचे पोलिसांसमोर आव्हान

मिळालेल्या माहितीनुसार, या पडक्या वाड्यात मागील काही दिवसांपासून एक कुत्री आणि तिची चार-पाच पिल्ले राहत होती. त्याच ठिकाणी अर्भकाचा मृतदेह आढळून आल्याने या घटनेबाबत परिसरात विविध चर्चा सुरू झाल्या. मात्र, घटनेमागील नेमके कारण अद्याप स्पष्ट झालेले नाही.

घटनेची माहिती मिळताच पोलिसांनी तातडीने घटनास्थळी धाव घेतली. प्रकरणाचे गांभीर्य लक्षात घेऊन फॉरेन्सिक पथकाला पाचारण करण्यात आले. पथकाने घटनास्थळाची पाहणी करून आवश्यक नमुने आणि पुरावे संकलित केले. या पुराव्यांच्या आधारे तपासाला दिशा देण्याचे काम पोलिसांकडून सुरू आहे.

अर्भकाचा मृतदेह नेमका किती दिवसांपासून त्या ठिकाणी होता, त्याचा मृत्यू कोणत्या कारणामुळे झाला आणि हा प्रकार नेमका कोणी केला, याचा तपास पोलिसांकडून करण्यात येत आहे. तसेच अर्भक स्त्री जातीचे आहे की पुरुष जातीचे, याबाबतही तपासानंतर अधिकृत माहिती स्पष्ट होणार आहे.

या प्रकरणी सेवानिवृत्त पोलीस कर्मचारी दावल शेख फरीद यांच्या फिर्यादीवरून पोलिसांनी भारतीय न्याय संहितेतील कलम ९४ अन्वये गुन्हा दाखल केला आहे. वृत्त लिहेपर्यंत या प्रकरणात कोणालाही ताब्यात घेण्यात आले नव्हते. घटनेचा पुढील तपास पोलीस करीत आहेत.

तुमच्या परिसरातील महत्त्वाची बातमी आमच्यापर्यंत पोहोचवा. स्थानिक घटना, नागरिकांच्या समस्या आणि महत्त्वाच्या घडामोडींची माहिती आम्हाला पाठवा.