संत गजानन महाराजांच्या पालखी दर्शनाला जात असताना काळाचा घाला; ऑटो रिक्षा विद्युत खांबावर आदळली, एका भाविकाचा जागीच मृत्यू

सुलतानपूर | विनायक कुटे 

श्री संत गजानन महाराजांच्या पालखी दर्शनासाठी सुलतानपूरकडे येणाऱ्या भाविकांच्या ऑटो रिक्षाचा शुक्रवारी सुलतानपूर-भानापूर मार्गावर भीषण अपघात झाला. उदनापूर येथून सुलतानपूरच्या दिशेने येणाऱ्या ऑटो रिक्षावरील चालकाचे अचानक नियंत्रण सुटले आणि रिक्षा रस्त्यालगत असलेल्या विद्युत खांबावर जाऊन आदळली. या अपघातात भगवान शामराव मुळे (वय ७०, रा. उदनापूर) यांचा जागीच मृत्यू झाला. ऑटोमधील इतर काही प्रवासी गंभीर जखमी झाल्याची प्राथमिक माहिती आहे.

श्री संत गजानन महाराजांच्या पालखीचे सुलतानपूर येथे आगमन झाल्याने पंचक्रोशीतील भाविक मोठ्या संख्येने दर्शनासाठी सुलतानपूरकडे येत होते. याचदरम्यान उदनापूर येथून भाविकांना घेऊन सुलतानपूरकडे येणाऱ्या ऑटो रिक्षाचा हा दुर्दैवी अपघात झाला.

मिळालेल्या प्राथमिक माहितीनुसार, ऑटो रिक्षा सुलतानपूरच्या दिशेने येत असताना चालकाचे वाहनावरील नियंत्रण सुटले. त्यानंतर ऑटो थेट रस्त्याच्या कडेला असलेल्या विद्युत खांबावर जाऊन आदळली. अपघातात ऑटोचे मोठे नुकसान झाले असून, त्यातील काही प्रवासी गंभीर जखमी झाले.

अपघाताची माहिती मिळताच स्थानिक नागरिकांनी घटनास्थळी धाव घेतली. नागरिकांनी जखमी प्रवाशांना ऑटोतून बाहेर काढून तातडीने उपचारासाठी मेहकर येथे हलविले. गंभीर जखमींना पुढील उपचारासाठी छत्रपती संभाजीनगर येथील रुग्णालयात हलविण्यात आल्याची प्राथमिक माहिती आहे.

या अपघातात भगवान शामराव मुळे यांचा जागीच मृत्यू झाला. वृत्त लिहेपर्यंत इतर जखमी प्रवाशांची नावे समजू शकलेली नाहीत. अपघाताची माहिती मिळताच पोलिसांनी घटनास्थळी दाखल होत पंचनामा केला. अपघात नेमका कोणत्या कारणामुळे झाला, याबाबत पुढील तपास सुरू आहे.

पालखी दर्शनासाठी निघालेल्या भाविकांच्या ऑटोला झालेल्या या भीषण अपघातामुळे सुलतानपूर आणि उदनापूर परिसरात हळहळ व्यक्त होत आहे.