काजूकतलीचा बॉक्स उघडताच धक्का! बुरशीच्या थरात चक्क जिवंत अळ्या; बुलढाण्यात FDA पथकाची रिलायन्स मॉलवर धडक

बुलढाणा |भागवत गायकवाड 

सणासुदीच्या तोंडावर बुलढाणा शहरातून ग्राहकांच्या आरोग्याशी संबंधित एक धक्कादायक प्रकार समोर आला आहे. शहरातील रिलायन्स मॉलमधून खरेदी करण्यात आलेल्या काजूकतलीच्या बॉक्समध्ये बुरशी आणि जिवंत अळ्या आढळल्याची तक्रार करण्यात आली आहे. या प्रकाराची माहिती मिळताच अन्न व औषध प्रशासनाच्या (FDA) पथकाने संबंधित ठिकाणी धडक देत तपासणी सुरू केली.

मिळालेल्या माहितीनुसार, संबंधित काजूकतली ‘सीताश्री-लक्ष्मीनारायण’ या कंपनीच्या नावाने असल्याचे नमूद करण्यात आले आहे. तक्रारदाराने दिलेल्या माहितीनुसार, काजूकतलीचा बॉक्स उघडताच मिठाईवर बुरशीचा थर दिसून आला. त्याचबरोबर त्यामध्ये जिवंत अळ्या वळवळताना आढळल्याचा दावा करण्यात आला आहे.

या धक्कादायक प्रकारामुळे मिठाईच्या गुणवत्तेबरोबरच तिची साठवणूक, उत्पादनाची स्थिती आणि विक्रीपूर्वी करण्यात येणाऱ्या तपासणीबाबतही प्रश्न उपस्थित झाले आहेत. संबंधित उत्पादनावर 8906151422017 हा बॅच/बारकोड क्रमांक नमूद असल्याची माहिती आहे.

प्रकार निदर्शनास आल्यानंतर याबाबत अन्न व औषध प्रशासनाकडे तातडीने तक्रार करण्यात आली. तक्रारीची गंभीर दखल घेत अन्न सुरक्षा अधिकारी जी. के. वसावे यांच्या नेतृत्वाखाली FDA बुलढाणा पथकाने संबंधित ठिकाणी जाऊन पाहणी केल्याची माहिती आहे.

FDA च्या पथकाकडून संबंधित उत्पादन तसेच उपलब्ध साठ्याची तपासणी करण्यात आली. या प्रकरणात उत्पादनाची स्थिती, पॅकेजिंग, बॅच क्रमांक, साठवणुकीची पद्धत आणि इतर आवश्यक बाबी तपासल्या जात असल्याचे सांगण्यात येत आहे.

दरम्यान, ही काजूकतली किती दिवसांपासून विक्रीसाठी ठेवण्यात आली होती? याच बॅचमधील आणखी किती बॉक्स बाजारात गेले आहेत? त्यापैकी किती बॉक्स ग्राहकांनी खरेदी केले आहेत? उत्पादनाची साठवणूक योग्य पद्धतीने करण्यात आली होती का? असे अनेक प्रश्न या घटनेनंतर उपस्थित झाले आहेत.

सणासुदीच्या काळात मिठाईची मागणी मोठ्या प्रमाणात वाढते. त्यामुळे अशा प्रकारच्या तक्रारीमुळे ग्राहकांमध्येही चिंता निर्माण झाली आहे. ग्राहकांनी पॅकबंद मिठाई खरेदी करताना उत्पादनाची तारीख, एक्सपायरी डेट, पॅकेजिंग आणि बॅच क्रमांक तपासण्याचे आवाहन केले जात आहे.

या प्रकरणात संबंधित मिठाईचे नमुने प्रयोगशाळेत तपासणीसाठी पाठवले जातात का आणि त्याचा अहवाल काय येतो, याकडे आता लक्ष लागले आहे. FDA च्या तपासणीत नियमांचे उल्लंघन आढळल्यास संबंधितांवर नियमानुसार पुढील कारवाई होण्याची शक्यता आहे.

मात्र, सध्या समोर आलेली माहिती ही तक्रार आणि प्राथमिक तपासणीशी संबंधित आहे. FDA चा अधिकृत तपासणी अहवाल किंवा प्रयोगशाळेचा निष्कर्ष समोर आल्यानंतरच या प्रकरणातील अंतिम वस्तुस्थिती स्पष्ट होणार आहे.

तुमच्या परिसरातील अशीच महत्त्वाची बातमी असल्यास kattanews.in ला कळवा आणि ही बातमी इतरांपर्यंत शेअर करा.