सिंदखेडराजाच्या विकासकामांसाठी आ. मनोज कायंदे मैदानात; ना. नितीन गडकरींकडे रस्ते-पुलांसाठी निधीची मागणी

देऊळगाव राजा : समाधान सरकटे 

सिंदखेडराजा विधानसभा मतदारसंघातील रस्ते आणि पुलांचा प्रश्न आता थेट दिल्लीपर्यंत पोहोचला आहे. रस्ते, पूल आणि प्रलंबित विकासकामांना गती मिळावी, यासाठी आमदार मनोज कायंदे यांनी केंद्रीय रस्ते वाहतूक व महामार्ग मंत्री नितीन गडकरी यांची नवी दिल्ली येथे भेट घेतली. यावेळी जालना-पुलगाव राष्ट्रीय महामार्गाच्या चौपदरीकरणासह मतदारसंघातील विविध विकासकामांना तातडीने मंजुरी देऊन आवश्यक निधी उपलब्ध करून देण्याची मागणी त्यांनी केली.

मतदारसंघातील ग्रामीण भागातील अनेक रस्त्यांची दुरवस्था, काही ठिकाणी पुलांचा अभाव आणि त्यामुळे नागरिकांना होणाऱ्या वाहतुकीच्या अडचणी याकडे आमदार कायंदे यांनी केंद्रीय मंत्री नितीन गडकरी यांचे लक्ष वेधले.

रस्त्यांच्या खराब अवस्थेमुळे केवळ सर्वसामान्य नागरिकांनाच त्रास होत नाही, तर त्याचा परिणाम शेतकरी, विद्यार्थी, व्यापारी आणि रुग्णवाहिकांच्या वाहतुकीवरही होत असल्याचे त्यांनी सांगितले. विशेषतः ग्रामीण भागातील चांगले रस्ते आणि पूल हे नागरिकांच्या दैनंदिन जीवनासाठी अत्यंत महत्त्वाचे असल्याचे त्यांनी स्पष्ट केले.

या भेटीत जालना-पुलगाव राष्ट्रीय महामार्गाच्या चौपदरीकरणाचा मुद्दाही प्रामुख्याने मांडण्यात आला. या मार्गाच्या विकासामुळे परिसरातील वाहतूक व्यवस्था अधिक सक्षम होण्यास मदत होईल. त्यामुळे या कामाला गती देण्याची विनंती आमदार कायंदे यांनी केली.

यासोबतच मतदारसंघातील विविध प्रमुख रस्ते, पूल आणि इतर पायाभूत सुविधांच्या प्रलंबित प्रस्तावांनाही मंजुरी मिळावी, अशी मागणी त्यांनी केली. विकासकामांसाठी आवश्यक निधी उपलब्ध झाल्यास अनेक वर्षांपासून भेडसावणाऱ्या वाहतुकीच्या समस्या कमी होण्यास मदत होईल, अशी अपेक्षा व्यक्त करण्यात आली.

उत्तम रस्ते हे विकासाचे प्रमुख माध्यम असल्याचे सांगत आमदार मनोज कायंदे यांनी रस्ते विकासाचे महत्त्व अधोरेखित केले. दर्जेदार रस्त्यांमुळे शेतमालाची वाहतूक सुलभ होते, उद्योग-व्यवसायांना चालना मिळते, रोजगाराच्या संधी वाढतात आणि नागरिकांना शिक्षण व आरोग्याच्या सुविधा अधिक वेगाने उपलब्ध होण्यास मदत होते, असे त्यांनी नमूद केले.

ग्रामीण भागातील रस्ते आणि पूल सक्षम झाल्यास शेतकऱ्यांना शेतमाल बाजारपेठेत पोहोचवणे सोपे होईल. विद्यार्थ्यांचा प्रवास अधिक सुरक्षित होईल, तर आपत्कालीन परिस्थितीत रुग्णवाहिकांनाही वेळेत रुग्णालयापर्यंत पोहोचता येईल. त्यामुळे मतदारसंघातील पायाभूत सुविधांचे जाळे मजबूत करण्याची गरज असल्याचे कायंदे यांनी सांगितले.

दरम्यान, आमदार मनोज कायंदे यांनी मांडलेल्या मागण्यांची केंद्रीय मंत्री नितीन गडकरी यांनी सकारात्मक दखल घेतली. सिंदखेडराजा विधानसभा मतदारसंघातील रस्ते विकासासाठी आवश्यक ते सहकार्य करण्याची तसेच विकासकामांसाठी निधी उपलब्ध करून देण्याबाबत सकारात्मक भूमिका व्यक्त केल्याचे सांगण्यात आले.

केंद्रीय मंत्र्यांच्या या सकारात्मक भूमिकेमुळे सिंदखेडराजा मतदारसंघातील रस्ते आणि पुलांच्या प्रलंबित कामांना गती मिळण्याची अपेक्षा व्यक्त होत आहे. आता प्रत्यक्षात कोणत्या कामांना मंजुरी मिळते आणि निधी कधी उपलब्ध होतो, याकडे मतदारसंघातील नागरिकांचे लक्ष लागले आहे.