सिंदखेडराजा |प्रा.दिलीप नाईकवाड
बुलढाणा जिल्ह्यातील सिंदखेडराजा तालुक्यातील जांभोरा परिसरातील शेतकरी राम रतन पवार यांच्यावर यंदाच्या खरीप हंगामाच्या सुरुवातीलाच मोठे संकट कोसळले आहे. गट क्रमांक ५९४ मधील सुमारे दोन एकर क्षेत्रात लागवड केलेल्या कपाशी पिकावर रात्रीच्या वेळी रोही (नीलगायी)च्या कळपाने धाड टाकत संपूर्ण पिकाची मोठ्या प्रमाणात नासधूस केल्याची घटना समोर आली आहे. नुकतीच उगवलेली आणि वाढीच्या महत्त्वाच्या टप्प्यावर असलेली कपाशीची रोपे तुडवून व मोडून टाकल्याने शेतकऱ्यांचे मोठे आर्थिक नुकसान झाले असून यंदाच्या उत्पादनाबाबतही अनिश्चितता निर्माण झाली आहे.
घटनास्थळी पाहणी केली असता शेतामध्ये मोठ्या प्रमाणात तुडवलेली कपाशीची रोपे, नीलगायींच्या पायांचे ठसे आणि पिकाच्या नुकसानीच्या स्पष्ट खुणा दिसून आल्या. शेतकरी राम रतन पवार यांनी दिलेल्या माहितीनुसार, रात्रीच्या अंधारात रोहीच्या कळपाने शेतात प्रवेश करून दोन एकरांतील कपाशी पीक अक्षरशः उद्ध्वस्त केले. काही तासांतच अनेक दिवसांच्या मेहनतीवर पाणी फिरल्याने शेतकरी कुटुंब मोठ्या चिंतेत सापडले आहे.
👉 विशेष जाहिरात | अधिक माहितीसाठी क्लिक करा
यंदा आधीच बदलत्या हवामानामुळे आणि शेतीसाठी वाढलेल्या उत्पादन खर्चामुळे शेतकरी अडचणीत आहे. त्यात वन्यप्राण्यांच्या वाढत्या उपद्रवामुळे नुकसान सातत्याने वाढत असल्याने शेतकऱ्यांच्या अडचणी अधिक गंभीर होत आहेत. पेरणी, बियाणे, खते, औषधे आणि मशागतीवर मोठा खर्च करून उभे केलेले पीक काही क्षणांत नष्ट होत असल्याने शेतकरी आर्थिकदृष्ट्या कोलमडत आहेत.
जांभोरा आणि परिसरातील अनेक गावांमध्ये गेल्या काही वर्षांपासून रोही (नीलगायी)ंचा वावर लक्षणीय वाढला आहे. कपाशी, सोयाबीन, तूर, हरभरा यांसारख्या पिकांचे वारंवार नुकसान होत असल्याच्या तक्रारी शेतकऱ्यांकडून सातत्याने करण्यात येत आहेत. अनेक वेळा शेतकऱ्यांना रात्री शेतात पहारा द्यावा लागत असला तरी मोठ्या कळपांमुळे पिकांचे संरक्षण करणे कठीण ठरत असल्याचे स्थानिक शेतकरी सांगतात.
राम रतन पवार यांनी महसूल विभाग आणि कृषी विभागाने तातडीने घटनास्थळी भेट देऊन पंचनामा करावा, झालेल्या नुकसानीचे वस्तुनिष्ठ मूल्यांकन करून शासनाकडून योग्य नुकसानभरपाई द्यावी, अशी मागणी केली आहे. तसेच रोहीच्या वाढत्या उपद्रवावर कायमस्वरूपी उपाययोजना करण्यासाठी वन विभागानेही प्रभावी पावले उचलावीत, अशी अपेक्षा त्यांनी व्यक्त केली आहे.
परिसरातील इतर शेतकऱ्यांनीही शासनाने या समस्येकडे गांभीर्याने लक्ष देऊन वन्यप्राण्यांमुळे होणाऱ्या शेतीच्या नुकसानीसाठी प्रभावी धोरण राबवावे, अशी मागणी केली आहे. वेळेत उपाययोजना न झाल्यास आगामी काळात शेतकऱ्यांचे आर्थिक नुकसान आणखी वाढण्याची भीती व्यक्त होत आहे.
संबंधित बातम्या
- सिंदखेडराजात SC उपवर्गीकरण विरोधी विराट मोर्चा; जय भीमच्या घोषणांनी शहर दणाणले, शासनाला दिला इशारा
- बुलढाणा जिल्ह्यातील १०,४६७ शेतकऱ्यांची कर्जमुक्ती यादी जाहीर; ‘हे’ काम त्वरित करा अन्यथा लाभ मिळणार नाही
- शेतकरी कर्जमाफी : 56 लाख शेतकऱ्यांपैकी पहिली यादी जाहीर, तुमचं नाव आहे का यात? पाहा संपूर्ण माहिती
वाचकांसाठी सूचना
आपल्या परिसरातही अशाच प्रकारची घटना घडली असल्यास फोटो, व्हिडिओ आणि संपूर्ण माहिती KattaNews.in कडे पाठवा. सत्य, अचूक आणि विश्वासार्ह स्थानिक बातम्या सर्वप्रथम वाचकांपर्यंत पोहोचविण्याचा आमचा प्रयत्न आहे.
