बुलढाणा जिल्ह्यातील १०,४६७ शेतकऱ्यांची कर्जमुक्ती यादी जाहीर; ‘हे’ काम त्वरित करा अन्यथा लाभ मिळणार नाही

बुलढाणा|समाधान सरकटे 

बुलढाणा कर्जमुक्ती यादी २०२६ अखेर जाहीर करण्यात आली असून राज्य सरकारच्या पुण्यश्लोक अहिल्यादेवी होळकर शेतकरी कर्जमुक्ती योजना २०२६ अंतर्गत जिल्ह्यातील तब्बल १० हजार ४६७ पात्र शेतकऱ्यांचा समावेश करण्यात आला आहे. यादीत नाव असलेल्या शेतकऱ्यांनी आधार प्रमाणीकरण तातडीने पूर्ण करणे आवश्यक आहे. अन्यथा कर्जमुक्ती योजनेचा लाभ मिळण्यास विलंब होऊ शकतो, असा इशारा प्रशासनाने दिला आहे.

विविध शासकीय योजनांची माहिती मिळवण्यासाठी 
📲 आमच्या WhatsApp ग्रुपमध्ये सामील व्हा

नेमकं काम काय करायचं आहे?

यादीत नाव समाविष्ट असलेल्या प्रत्येक शेतकऱ्याला आधार प्रमाणीकरण (Aadhaar Authentication) ही प्रक्रिया पूर्ण करावी लागणार आहे. जोपर्यंत ही प्रक्रिया पूर्ण होत नाही, तोपर्यंत कर्जमुक्तीची रक्कम शेतकऱ्यांच्या बँक खात्यात जमा होणार नाही, असं प्रशासनाकडून सांगण्यात आलं आहे. त्यामुळे विलंब न करता ही प्रक्रिया पूर्ण करणं गरजेचं आहे.

योजना नेमकी काय आहे?

राज्य सरकारने शेतकऱ्यांना दिलासा देण्यासाठी ही कर्जमुक्ती योजना सुरू केली आहे. पालकमंत्री तथा मदत व पुनर्वसन मंत्री मकरंद जाधव पाटील यांच्या मार्गदर्शनाखाली ही योजना जिल्ह्यात वेगाने आणि प्रभावीपणे राबवण्यासाठी प्रशासनाकडून नियोजन करण्यात आलं आहे.

याद्या कुठे पाहायला मिळतील?

पात्र लाभार्थ्यांची नावं पाहण्यासाठी शेतकऱ्यांना कुठेही लांब जायची गरज नाही. गावातीलच पुढील ठिकाणी नोटीस बोर्डावर याद्या लावण्यात आल्या आहेत:

• ग्रामपंचायत कार्यालय
• ग्रामसेवा सहकारी संस्था
• तलाठी कार्यालय
• सहकारी बँकेची शाखा
• सहाय्यक निबंधक कार्यालय

आधार प्रमाणीकरण कसं करावं?

सर्वप्रथम यादीत आपलं नाव आहे की नाही ते तपासा. नाव असल्यास फार्म आयडी आणि आधार कार्ड सोबत घेऊन जवळच्या ई-सेवा केंद्रावर जावं आणि तिथे आधार प्रमाणीकरणाची प्रक्रिया पूर्ण करून घ्यावी.

ज्या शेतकऱ्यांचा आधार क्रमांक अद्याप बँक खात्याशी लिंक झालेला नाही, त्यांनी संबंधित बँकेत किंवा संस्थेत जाऊन आधी ती प्रक्रिया पूर्ण करून घ्यावी, कारण त्याशिवाय पुढची प्रक्रिया अडू शकते.

अडचण किंवा तक्रार असल्यास काय करावं?

योजनेच्या अंमलबजावणीदरम्यान काही शेतकऱ्यांना अडचणी येऊ शकतात. अशा वेळी घाबरून जाण्याची गरज नाही — संबंधित तालुकास्तरीय तक्रार निवारण समितीकडे जाऊन तक्रार नोंदवता येईल आणि तिथे योग्य मार्गदर्शन मिळेल.

जिल्हाधिकाऱ्यांचं शेतकऱ्यांना आवाहन

जिल्हास्तरीय कर्जमुक्ती समितीचे अध्यक्ष तथा जिल्हाधिकारी डॉ. प्रवीणकुमार देवरे यांनी सर्व पात्र शेतकऱ्यांना आवाहन केलं आहे की, आवश्यक कागदपत्रांची पूर्तता करून आधार प्रमाणीकरण तातडीने पूर्ण करावं आणि शासनाच्या या योजनेचा लाभ घ्यावा.