धामणगावात अवैध दारू आणि जुगार अड्ड्यांवर धाड पोलिसांचा धडाका; 5 जणांवर गुन्हे

बुलढाणा | भागवत गायकवाड

बुलढाणा जिल्ह्यातील धामणगाव आणि परिसरात अवैध दारू विक्री तसेच जुगार व्यवसायाविरोधात धाड पोलीस स्टेशनने राबविलेल्या विशेष मोहिमेत मोठी कारवाई करण्यात आली आहे. या कारवाईत एकाच दिवशी पाच स्वतंत्र गुन्हे दाखल करण्यात आले असून अवैध हातभट्टी दारू, देशी दारूच्या बाटल्या, जुगाराचे साहित्य आणि रोख रक्कम असा एकूण ₹4,545 किमतीचा मुद्देमाल जप्त करण्यात आला आहे. या कारवाईमुळे परिसरात बेकायदेशीर धंदे करणाऱ्यांमध्ये खळबळ उडाली आहे.

पोलीसांनी दिलेल्या माहितीनुसार, 23 जुलै 2026 रोजी धाड पोलीस स्टेशनच्या पथकाने धामणगाव परिसरात अवैध धंद्यांविरोधात विशेष मोहीम राबवली. या मोहिमेदरम्यान संतोष दगडुबा सुराशे, शिवशंकर कीसन महाले, सागर समाधान महाले आणि गौतम रंगनाथ मोरे यांच्याविरुद्ध महाराष्ट्र दारूबंदी कायद्यान्वये गुन्हे दाखल करण्यात आले. तसेच पठाण समद इब्राहिम याच्याविरुद्ध महाराष्ट्र जुगार प्रतिबंधक कायद्यान्वये गुन्हा नोंदविण्यात आला.

👉 विशेष जाहिरात | अधिक माहितीसाठी क्लिक करा

कारवाईदरम्यान पोलिसांनी अवैध हातभट्टी दारू, देशी दारूच्या बाटल्या, जुगारासाठी वापरले जाणारे साहित्य तसेच रोख रक्कम जप्त केली. जप्त केलेल्या मुद्देमालाची एकूण किंमत ₹4,545 इतकी असल्याची माहिती पोलिसांनी दिली आहे. सर्व आरोपींविरुद्ध आवश्यक कायदेशीर कारवाई करण्यात आली असून प्रकरणाचा पुढील तपास सुरू आहे.

ही कारवाई पोलीस अधीक्षक श्री. निलेश तांबे (भा.पो.से.), अपर पोलीस अधीक्षक श्री. अमोल गायकवाड आणि उपविभागीय पोलीस अधिकारी श्री. प्रदीप पाटील यांच्या मार्गदर्शनाखाली पार पडली. धाड पोलीस स्टेशनचे ठाणेदार सपोनि अजिनाथ मोरे यांच्या नेतृत्वाखाली सहाय्यक फौजदार प्रभाकर लोखंडे, पोलीस हेड कॉन्स्टेबल युवराज मुळे आणि पोलीस कॉन्स्टेबल कुमोद जाधव यांनी या मोहिमेत सहभाग घेतला.

धाड पोलीस स्टेशनकडून अवैध दारू निर्मिती, विक्री, वाहतूक तसेच जुगार व्यवसायाविरोधात यापुढेही सातत्याने प्रभावी कारवाई सुरू राहणार असल्याचे स्पष्ट करण्यात आले आहे. नागरिकांनी आपल्या परिसरात अशा प्रकारचे बेकायदेशीर व्यवसाय सुरू असल्याची माहिती तातडीने पोलिसांना देऊन कायदा व सुव्यवस्था राखण्यासाठी सहकार्य करावे, असे आवाहनही पोलिसांनी केले आहे.